Сур харвааны талбайд Халх сурын харваа эхлэхэд бэлэн болоод байна. Хуваарь ёсоор 10.00 цагт Халх сурын харваа эхлэх байсан ч бүртгэлийн ажиллагаа дуусаагүй учир 12.00 цагт эхлэхээр болжээ.

Жилээс жилд сур харваанд оролцох харваачдын тоо нэмэгдэж байгаа талаар иргэд ярьж байна.

Өчигдөр халх сурын хүүхдийн харвааны тэмцээн болсон бөгөөд өнөөдөр насанд хүрэгчдийн тэмцээн болох юм.

Жилд хүүхдийн тоотойгоо нийлээд 200 гаруй харваач халх сурын харваанд оролцдог байна.

Зохион байгуулагчдын ярьж буйгаар “хөдөө орон нутгаас ирж байгаа хүмүүс өнөөдөр өглөө хотод орж ирсэн болохоор бүртгүүлж амжаагүй байж байгаад одоо л бүртгүүлж байна. Тиймээс энэ жилийн нарийн тоон мэдээлэл өгөх боломжгүй” гэсэн юм.

Улсын баяр наадмын сур харваа нийт гурван төрлөөр буюу халх, урианхай, буриад харваа гэж явагддаг.

Буриад харваа өмнөх өдрүүдэд явагдаад дууссан бол өнөөдөр эхлэх Халх сур харвааны эцсийн дүн энэ сарын 12-нд гарах юм байна.

Халх сурын харваа нь эмэгтэй харваач 65 метр, эрэгтэй нь 75 метрээс тус тус бүр 40 сум тавьдаг билээ.

Ингээд эрхий мэргэн харваачиддаа амжилт хүсээд

Нум нь хүчтэй
Сум нь мэргэн
Хараа нь хурц байх болтугай гэж ерөөе.

Ч.Болор