Улсын баяр наадмын үеэр гэмт хэрэг, зөрчил цөөнгүй гардаг. Наадамчин олонд сэрэмжлүүлэг болгох үүднээс ЦЕГ-ын Хэвлэл мэдээллийн төвийн дарга, цагдаагийн хурандаа Т.Сайнжаргалтай ярилцлаа.

-Баярын үеэр гэмт хэрэг, зөрчлийн ямар дуудлага зонхилдог вэ. Түүнээс урьдчилан сэргийлэх боломжтой юу?
-Олон нийтийг хамарсан баяр ёслолын үеэр бага насны хүүхэд эцэг эхээсээ төөрөх явдал хамгийн их гардаг. Ялангуяа улсын баяр наадмын үеэр төв цэнгэлдэх хүрээлэнд 4-6 насны хүүхдүүд төөрдөг. Бага насны хүүхдээ дагуулж яваа эцэг эхчүүд олны бужигнаан дунд сонор сэрэмжээ сулруулснаас хүүхдээ

төөрүүлдэг. Өнгөрсөн наадмын эхний хоёр хоногт 14-16 хүүхэд төөрсөн байсан. Тухайн үед цагдаагийн ажилтнууд бүгдийг нь олж, эцэг эхэд нь хүлээлгэж өгсөн. Цэнгэлдэх хүрээлэнгээс гараад хотын төв рүү орсон хойноо хүүхдээ алга болсныг мэдсэн эцэг эх ч байсан. Хүүхдүүд дагуулж яваа томчуудаасаа төөрснөөс болж осолдож эндэх явдал гарахыг үгүйсгэх аргагүй. Тухайлбал, өнгөрсөн жилийн наадмаар эцэг эх нь хуушуур авахаар дугаарлаж байх хооронд хүүхэд нь төөрөөд машинд дайруулж гэмтсэн тохиолдол бий. Тиймээс наадмын талбай болон олон хүнтэй газраар хүүхдээ дагуулж явах хүмүүст анхаарал болгоомжтой байхыг сануулж байна.

-Баярын үеэр халаасны хулгайн гэмт хэрэг цөөнгүй гардаг байх. Энэ талаар?
-Үзвэр үйлчилгээ, худалдаа наймаа сонирхсон хүмүүсийн анхаарал суларсныг далимдуулж цүнх, халааснаас эд зүйлийг нь хулгайлах хэрэг олон гардаг. Тэр дундаа баяр наадам сонирхохоор ирсэн гадны зочид төлөөлөгч, жуулчид хулгайн хэргийн хохирогч болох нь цөөнгүй. Тиймээс аялал жуулчлал эрхэлдэг аж ахуйн нэгж болон гадны төлөөлөгч урьсан байгууллагууд зочдынхоо аюулгүй байдалд анхаараасай гэж хүсч байна. Гадаадын аль ч оронд "Халаасны хулгайчаас болгоомжил" гэсэн анхааруулга жуулчдад тараадаг. Гэтэл манайхан ичиж, нэрэлхээд тийм төрлийн сэрэмжлүүлэг тараадаггүй. Уг нь тухайн үйлчилгээ эрхэлдэг компани болон хөтөч нь сайтар хэлж, бичгээр анхааруулга тараавал хулгайд эд зүйлээ алдах хүмүүсийн тоо цөөрөх байх.

Түүнчлэн автомашин дотроосоо эд зүйлээ алдах явдал цөөнгүй гардаг. Иргэд автомашины зөвшөөрлийн ангиллынхаа дагуу зогсоолд машинаа байрлуулж, хаалга, цонхыг нь шалгаж байвал хулгайн хэргээс урьдчилан сэргийлж чадах байх.

Баярын үеэр цагдаагийн туслалцааг иргэдэд ойртуулах зорилгоор цэнгэлдэх хүрээлэнгийн төв асрын баруун талд цагдаагийн пост ажиллуулна. Тус постонд Хан-Уул дүүргийн Цагдаагийн хэлтсийнхэн 24 цагаар жижүүрлэнэ.

-Аливаа баярын үеэр архи согтууруулах ундаатай холбоотой зөрчил ёс юм шиг гардаг. Энэ тал дээр хяналт тавих боломж бий юү?
-Баяр ёслол тэр дундаа үндэсний хэмжээний томоохон баярын үеэр архи согтууруулах ундааг дууриалган хийх хэрэг ихэсдэг. Хямд үнэтэй, хаана үйлдвэрлэсэн нь тодорхойгүй архи худалдаж авч эрүүл мэндээрээ бүү хохироосой гэж хэлмээр байна. Мөн үндэсний бөхийн барилдааны завсарлагаар болон 12-13-ны өдрүүдэд иргэд голын эрэг рүү очдог. Томчууд согтуу үедээ эсвэл бага насны хүүхдээ голын усанд оруулснаас болж осолдож энэдэх аюултайг анхааруулж байна.

А.Ням-Өлзий