“Зуун хувь”, “Яг одоо” зэрэг хит дуугаараа  залуусыг байлдан дагуулаад буй  “B” продакшны “нялх од” хэмээн нэрлэгддэг  залуу дуучин  Эгшиглэн буюу Т.Болортуяатай  ярилцлаа.

-“Амьдралын тоглоом” дуугаар хоёр жилийн  өмнө урлагийн тайзнаа гарч ирсэн санагдаж байна. Ер нь урлагийн ертөнцөд  хөл тавьсан үеэ эргэн дурсахгүй юу?
-”STV” телевизээс  дуулах  хүсэлтэй залуусын дунд зохион байгуулсан “Шинэ давалгаа” тэмцээнд оролцож байхдаа Б.Наранзун ахтай танилцсан. Тэр  үед Б.Наранзун ах  “B” продакшнтэй хамтарч ажиллавал яасан юм бэ гэсэн санал тавьсан. Ингээд 2006 оны 11 дүгээр сараас  “B” продакшнд ажилтнаар нь орсноор уран бүтээлийн гараа  маань  эхэлсэн. Мэдээж анх сандрах, хэцүү гэх зүйл олон байсан.  Гэхдээ дуу өөрөө хүнийг хөгөлж, эрч хүчтэй болгодог болохоор би үүнийг үнэхээр аз завшаантай хэрэг гэж боддог.

-”B” продакшнаас өрх тусгаарласан  гэх мэдээлэл гарсан байсан. Хэрвээ энэ мэдээлэл үнэн бол гарах болсон шалтгаан нь юу вэ?
-Тийм мэдээлэл хэвлэлээр цацагдсан байсан л даа. Гэхдээ миний хувьд “В” продакшнаас гараагүй. Яагаад тийм мэдээлэл гарсныг сайн мэдэхгүй байна. Ямар ч байсан миний хувьд “В” продакшнтай хамтарч ажилласаар байгаа.         

-Тэгвэл таны уран бүтээлээр сонин сайхан юу байна?
-Уран бүтээлийн сонин сайхан гэвэл анхны цомгоо гаргах гээд нэлээн зав муутай байгаа. Цомогт  маань 11 дуу багтаж байгаа бөгөөд  ирэх найман сар гэхэд үзэгч фенүүдийн хүртээл болох болов уу. Одоохондоо цомгийнхоо нэрийг нууцалъя. (инээв)

-Цомогтой холбогдуулаад CD-ний баяр юм уу тоглолт болох уу?
-Тийм ээ цомог гарсны дараа ойрын хугацаанд тоглолт хийх төлөвлөгөөтэй байгаа. Яг хэзээ гэдгийг нь одоо хэлэх боломжгүй нь ээ.

-”Love song” болон “Зуун хувь” гэх зэрэг дууг дуучин ВХ тэй хамтран дуулсан. Дууны клипэн дээр гарч буй дүрстэй  холбогдуулаад ч тэр юм уу та хоёрыг үерхэж байгаа гэх  яриа хүмүүсийн дунд дэлгэрсэн байсан. Энэ яриа ортой болов уу?
-Харин хүмүүс тэгж яриад байдаг болсон байна лээ.(инээв) Бид хоёр зөвхөн уран бүтээлийн хамтрагчид.  ВХ бид хоёр хайр сэтгэлийн  холбоогүй. Ямар нэгэн үерхэл хайрын холбоо байхгүй.  Уран бүтээл дээр хамтарах, дууныхаа өнгө аяст тааруулж ямар нэгэн үйл хөдлөл, дүр гаргах зэрэг нь уран бүтээлч хүний хувьд хийх л ёстой ажил.  Миний хувьд найз залуутай. Түүндээ бас маш их хайртай.

-Өөрийн тань дуулсан “Найрах арга чинь буруудаад байна”, “Зуун хувь” дуунууд нэг утгыг агуулсан байдаг. Үнэхээр тухайн дуунуудад өөрийн чинь бодол сэтгэл  агуулагдсан уу?
-Яг зуун хувь  илэрхийлэх боломжгүй л дээ.Ер нь дуу гэдэг өөрөө хүний сэтгэлд маш их урам ,эрч хүч өгдөг юм болов уу гэж боддог.  Дуун дээр гарч байгаа шиг тийм хүн нэлээн ховор байх.  Эдгээр дуунуудыг  миний мөрөөдлийг илэрхийлсэн дуу гэж хэлж болох байх.

“Найрах арга чинь буруудаад байна” дууны үгийг Quiza ах , харин “зуун хувь” дууг  ВХ бичсэн. Тэд  эмэгтэй хүний хүсэл сэтгэлийг мэдэрч, эмэгтэй хүн бичсэн юм шиг тийм гоё дуу зохиосон нь бас гайхалтай  хэрэг.

-Гэр бүлийнхнийхээ талаар цухас дурьдаж болох уу?
-Одоохондоо  ээж  Америк руу ажлаар явсан. Аав, хоёр дүүтэйгээ амьдарч байгаа.             

-”Universe best songs” нэвтрүүлэгт танай хоёр дүү дөрвийн даваа хүртэл амжилттай оролцсон. Олны танил гэгдэх хамтлаг дуучид ч мөн тус тэмцээнд идэвхтэй оролцож байсан. Өөрийн тань хувьд ч энэ тэмцээнд амжилттай оролцох боломж өндөр байсан болов уу?
-Энэ тэмцээнд орооч гэсэн санал тавьж байсан л даа. Гэхдээ би урьд нь “Шинэ давалгаа”-д оролцож байсан болохоор дахиад оролцох нь дэмий юм  гэж бодсон. Харин дүү нараа их дэмжсэн.

-”Global international” дээд сургуулийн банк санхүүгийн  чиглэлээр суралцдаг гэсэн. Энэ чиглэлээр суралцах , мөн уран бүтээлээ туурвих зэрэгт цаг хугацааг хэрхэн зохицуулдаг вэ?
-Үнэхээр хүсэл сэтгэл байвал болохгүй бүтэхгүй зүйл гэж нэгээхэн ч үгүй байх. Урлагийн хүн гэж уран бүтээлээ туурвих хэрэгтэй ч,  мэдлэг боловсрол мэргэжил хэрэгтэй юм болов уу гэдэг үүднээсээ банк санхүүгийн мэргэжлээр суралцаж байна. Уран бүтээл мэргэжил хоёроо алийг нь ч орхигдуулалгүй  хичээнгүйлэн явах болно.

-Тэгвэл таны туйлын хүсэл зорилго юу вэ?
-Хэцүү бэрхшээлтэй бүх асуудлын ард гарчихаад амар тайван ертөнцийг буй болгоод сайхан амьдрах л миний туйлын хүсэл.

Ц.Өлзийбилэг