Премьер лигийн хувьцаа эзэмшигчид өчигдөр хуралдаж санал нэгтэйгээр контакттай бэлтгэл хийхийг зөвшөөрлөө. Энэ нь цар тахлын байдал намжих үед лигийг үргэлжлүүлэхэд нэг алхам ойртож буй хэрэг юм. 

Өөрөөр хэлбэл хэсэг хэсгээрээ бэлтгэлийн талбайдаа ээлжлэн ирж, тусдаа бэлтгэл хийж байсан тоглогчид одоо бүлгээрээ буюу бүрэлдэхүүнээрээ хамт бэлтгэлээ хийх боломжтой. Гэхдээ бэлтгэлийн талбайн аюулгүй байдлыг хангасан байх шаардлагатай бөгөөд тоглогч болон ажилчид долоо хоногт хоёр удаа шинжилгээ өгч буй. 

Энэхүү шийдвэрийг Их Британийн засгийн газраас мөн зөвшөөрсөн бөгөөд улирлыг хэзээ үргэлжлүүлэх тухай шийдвэр хараахан гараагүй байна. 

Мөн даваа болон мягмар гарагуудад лигийн 1008 тоглогч, болон ажилчдад коронавирусийн шинжилгээ хийхэд 4 хүний хариу эерэг гарчээ. Үүнээс өмнө тавдугаар сарын 19-22 нд 996 хүнд шинжилгээ хийхэд 2, мөн сарын 17-18-нд 748 хүнд шинжилгээ хийхэд 6 хүнээс коронавирус илрээд байв.

Дараагийн шинжилгээг хийхдээ клуб бүрт ногдох тестийн тоог 50-60 болгон нэмэгдүүлэх аж. 

Эх сурвалж: PremierLeague.com