Сонгуулийн тухай хуулийн дагуу энэ удаагийн сонгуульд оролцох нам, эвслүүд нэр дэвшигчдийнхээ нэрийг зарлах ёстой. Энэ дагуу АН-ын Үндэсний бодлогын хороо өнөөдөр 12:00 цагаас хуралдан, нэр дэвшигчдээ тодруулжээ. 

Хуулийн дагуу тавдугаар сарын 16-ны дотор нэрсийг гаргаж, СЕХ хүргүүлэх ёстой бөгөөд АН-ын ҮБХ 23:58 цаг хүртэл хуралдан шийдвэр гаргасан болохыг хуралдааныг даргалсан УИХ-ын гишүүн Я.Санжмятав мэдээллээ. 

Хуралдаанаар тодруулсан 76 нэр дэвшигчийн талаар АН-ын Ерөнхий нарийн бичгийн дарга Ц.Баатархүү "Монгол Улсыг 2020-2024 онд цаашдаа хөгжлийн гол реформыг хийх төлөөлөгчийг эх орны өнцөг булан бүрээс сонгогдсон ҮБХ-ны гишүүдийн нууц санал хураалтаар тодруулсан. ҮБХ-ны тодруулсан нэр дэвшигчдийн ажил мэргэжлийг харвал 46 хувь нь эдийн засагч, санхүүчид байна. Монгол Улсын эдийн засаг санхүүгийн өсөлтийг өрх бүрт хүргэх мөрийн хөтөлбөрийг боловсруулсан тул нийт нэр дэвшигчдийн 46 хувь нь эдийн засагчид байна. 

Хуулиар иргэдээ хамгаалах уриатай бид сонгуульд оролцож байна. Нэр дэвшигчдийн 33 хувийг хуульч, эрхзүйч мэргэжилтэй хүмүүс байна. Инженерүүд 7.6 хувь байна. Мөн нийт нэр дэвшигчдийн 71 хувь нь өмнө нь төрийн алба хашиж байгаагүй, УИХ-ын гишүүн, сайдаар ажиллаж байгаагүй. Мөн насны бүлгээр авч үзвэл 50 орчим хуь нь залуучууд байна. АН энэ удаад 29 тойрогт залуучуудаа илгээж байна" гэлээ.