Хүн төрөлхтөн, дэлхий дахинд аймшиггүйгээр халдагсдын эсрэг зоригтойгоор зогсогч Милла Йововичийн "Тав дахь элемент", "Харийн хүн" кинонуудыг бид сайн мэднэ. Харин домогт, эрэлхэг зоригт, дайчин бүсгүй Жанна Д'Аркийн дүрээр Милла сая сая кино хорхойтнуудын сэтгэлд хоногшсон жүжигчин. Багаасаа загварын ертөнцөд хөл тавьсан тэрбээр 1980,1990-ээд оны алдартай загвар өмсөгчид Синди Кроуфорд, Наоми Кэмпбелл, Клаудиа Шиффер нарын хамтаар загварын тайзыг чимж, эзэгнэж, Францын гоо сайхны "Л'Ореал" фирмийн нүүр царай болж байв. Өдгөө ч "Л'Ореал"- тай хамтран ажилласан хэвээр. Тэрбээр "Интервью" сэтгүүлийн Гленн О'Брайнд ярилцлага өгчээ.

-Сайн уу, Милла.
-Сайн уу. Сонин сайхан юутай байна даа.

-Бид олон жилийн өмнө Кэлвин Клайны теле-рекламд хамт тоглож байсан. Тэр рекламны хориотой зарим хэсэг YouTube дээр байх юм.
-Үнэхээр үү. Ямар хэсэг?

-Тийм шүү. Нэгэн залуу чиний хүзүүг үнсэнэ. Чи эргэж хараад. "Намайг ав" гэнэ.
-Дахин харах, үзэхийг хүсдэггүй олон зүйл надад байдаг шүү. 18 настайдаа Техасын Остинд байхдаа нэгэн дэлгүүрт хамтлагийнхантайгаа дуулж байсан гэхчлэн...

-Ингэхэд таны шүтэн бишрэгчид уран зөгнөлт кинонд их дуртай "тэнэг" залуус уу, эсвэл үзэсгэлэнтэй, эрч хүчтэй эмэгтэй баатраас эрч хүч авдгаа мэдэрдэг охид юм болов уу?
-Хоёулаа гэж бодож байна. "Resident Evil" киноны маань хамгийн гайхалтай бас хамгийн хөгжилтэй нь охид найз залуустайгаа үздэгт байгаа юм. Кино маань эмэгтэй, эрэгтэй гэлгүй бүгдийг нь маш их бухимдуулдаг. Учир нь адал явдалт, аймшгийн киноны төрлөөс жаахан өөр. Би Англид очсон юм. Манай хөрш сүйт залуугийн маань эгчийнх. Тэднийх зургаагаас 12 насны таван охинтой. Би тэднийг зоригтой, өөрсдөдөө итгэлтэй болгохыг хүссэн. Тэгээд явахаасаа өмнө тэдэнд хандаж, "Хөвгүүдээс илүүтэйгээр охид бие биетэйгээ илүү дотно байдаг. Тиймээс бид гар тулааны урлагт суралцаж чадна. Гар тулаан бол эмэгтэй хүнд зориулагдсан. Учир нь бид ихэвчлэн эрэгтэйчүүдээс намхан, хурдан байдаг" гэж хэлсэн юм. Тэд одоо бие хамгаалах урлагт суралцаж байгаа.

-Гайхалтай хэрэг шүү?
-Энэ үнэхээр сэтгэл хөдөлгөм. Амьдралынхаа туршид тэднийг хоёр дахь эгнээнд тоглоосой гэж би хүсдэггүй.

-Үеийн үед эмэгтэй тулаанч баатар байсан. 1960-аад оны үед "Өшөө авагчид"-ын Эмма Пил байлаа. Харин та тулаанч оддын дүрийг дараагийн шатанд гаргаж?
-Тийм шүү, яг үнэн. "Resident Evil" цувралууд маш алдартай видео тоглоомоос үүдэлтэй. Миний дүү тэр тоглоомыг их тоглодог байлаа. Тэрбээр Жилл Валентины дүрд байнга тоглоно. Харин хааяа эмэгтэй баатрынх нь дүрд тоглож харагдана. Хөвгүүд охидын дүрд тоглох боломжтой цорын ганц тоглоом юм шиг ээ. Тиймээс л би энэ тоглоомыг өргөн дэлгэцийн кино болгоно гэхэд нь маш их сонирхсон юм шүү дээ.

-Сонирхолтой л юм.
-Энэ бүхэн яагаад Пол киноныхоо зохиолыг бичиж, продюсерлох болсон талаар ихийг хэлж байгаа юм. Тоглоомд нэгэн охин маш их үүрэг гүйцэтгэдэг. Тиймээс тэр охиныг киноны гол дүр болгохоор Пол шийдсэн.

-Би видео тоглоомынх нь талаар юу ч мэдэхгүй юм л даа. Бусад дүрүүдийн тухайд, тэд бас л тоглоомд байдаг дүрүүд үү?
-Нэгэнт л кино хийж байгаа бол тухайн орчин, нөхцөл байдалд баригдах хэрэггүй юм шиг надад санагддаг. Пол өөрийн ертөнцийг бий болгохыг хүссэн. Тиймээс дүрүүд, тэдний сонголт, тэдэнтэй холбоотой үйл явдлын тухайд бид өөрсдийн гэсэн бүтээлч эрх чөлөөг мэдрэх юм. Тухайн тоглоомын дүрүүд кино дэлгэцнээ амилвал тэдэнд бид баригдана. Харин гол дүрийн тухайд найруулагч маань илүү эрх чөлөөт нэгэн байлгахаар сэтгэл шулуудсан. Тоглоомын дүрийг тэр хэвээр дэлгэцнээ амилуулах боломж ч байгаагүй. Ямар зэр зэвсэг хэрэглэх, юу хийх зэрэг нь хязгаарлагдмал байсан юм.

-Видео тоглоом гэдэг өөрөө хийсвэр ертөнц. Яг л шашин шүтэхтэй адил?
-Тийм ээ. Уран сэтгэмжийн үр дүнд бий болдог болохоор видео тоглоомуудыг кино болгоход маш тохиромжтой. Манай киноны бүх уран бүтээлчид тоглоом таалагдсан. Үзэгчид ч мөн адил. Энэ л хамгийн чухал.

-Та биеийн тамир эсвэл тулааны урлагт ер нь авьяастай хүн үү эсвэл тулааны урлагт суралцаж байв уу?
-Ямагт л тулааны урлагт дуртай байсан. Өсвөр насандаа л энэ урлагаар хичээллэж эхэлсэн. Харин "Тав дахь элемент" кинонд тоглосны дараагаар жинхэнээсээ сургуулилж эхэлсэн.   Өмнө нь сонирхлын дагуу хичээллэж байснаас тэс өөр мэдрэмж төрөхийг би мэдэрсэн. Бие хамгаалах урлагаар хичээллэж байх үедээ та тодорхой чадваруудыг суралцахаас гадна өөрийгөө хэн бэ гэдэгт илүү их анхаарал хандуулж, өөрөө өөртөө хяналт тавьж чадна. Бага байхын өөрийгөө багтай нинжа мэтээр төсөөлдөг байлаа. Тиймээс хэт их хүчирхэг, эрч хүчтэй байх нь миний дотоод мөн чанар байх.

-"Хар бүс" шиг л...
-Үгүй, үгүй. Харамсалтай нь, би "хар бүс" байхаар өдөр бүр хангалттай хичээллэдэггүй. Хэрэв энэ талаар бодож эхлэх юм бол тэр ертөнцөд нэн даруй орж чадна гэж би боддог. Харин охиноо энэ урлагаар хичээллүүлэх талаар бодож байгаа. Хоёр нас хүрэхээр нь түүнтэй сургуулилж эхэлнэ. Ээжтэйгээ хамт хийдэг байсан зүйлсийн нэг нь энэ бие хамгаалах урлагийн хичээл байгаасай гэж би хүсдэг.

Учир нь өөрийн бие махбодио хянаж чадах тийм бүрэн хяналт миний охиндоо өгөх хамгийн чухал бэлгүүдийн нэг юм шиг надад санагддаг юм. Өнөөгийн нийгэмд өөрөө өөрийгөө хамгаалах чадвартай байхыг мэдэх нь маш чухал. Энэ танд хэн нэгэн халдахын тухай асуудал биш. Өөртөө итгэлтэй байхын тухай юм. Алхаа бүрдээ та итгэлтэй байж, орчин тойрон, хүрээлэн буй хүмүүсээс илүү анхааралтай байж чадна. Эмэгтэйчүүдийн хувьд энэ маш чухал гэж би боддог.

-Энэ зүйл загвар өмсөгч бүрийн сургуулилтын нэг хэсэг баймаар?
-Загвар өмсөгчид зураг авахуулахад илүү гайхалтай зүйлсийг хийх чадвартай. Өнгөрсөн жилийн намрын шоун дээр олон охид унахыг харж байлаа. Магадгүй тэд бодит амьдрал дээрээ өндөр өсгийтэй гутал өмсөөд байдаггүй байх.

-Хэрэв тэд тань шиг ингэж хичээллэдэг бол өндөр өсгийн дээр алзахгүй байх тийм үү?
-Бүжигчин охид "гудамжны" охидоос илүү бие сайтай байдаг. Бүжиг гэдэг өөрөө бие хамгаалах урлагийн нэгэн адил сахилга бат. Та юу хийдэг байх нь хамаагүй, өөртөө итгэх итгэлтэй л байх хэрэгтэй. Үүнийг хэн ч танаас авч чадахгүй.

-Ингэхэд та ямагт өөртөө итгэлтэй байв уу? Анх таньтай танилцахад 20 настай л байсан байх. Та их нуруутай хүн шиг санагдсан. Загвар өмсөгчийнхөө хувьд ихэд бие даасан, тогтсон байсан?
-Өөртөө итгэх итгэл гэдэг ирж, явж байдаг ямар нэг зүйл шиг ээ. Гэр бүлийнхэн минь багаас маань л надад их анхаарал халамж тавьж, хайрласан өсгөсөн нь төрөлхийн өөртөө итгэх итгэлийг надад төлөвшүүлсэн байх. Хар багаасаа л загварын ертөнцөд орсон болохоор "Ийм ажил хийхэд би үнэхээр бэлэн байна уу?", "Би зөв сонголт хийж байна уу?" гэх мэт асуултууд гарч ирсэн. Өөртөө итгэх итгэл гаднаа, харин дотроо маш их эргэлзээ байсан гэж боддог. Есөн настайгаасаа л жүжиглэх, дуулах, бүжиглэх хичээлд явж байсан нь надад бас их нөлөөлсөн.

-Сурч байсан зүйлсээс чинь хамгийн хэцүү нь юу байв?
-Ээжийнхээ итгэл найдварыг алдахгүй байх хамгийн хэцүү. Би ямар нэгэн зүйлийг зөв хийгээгүй болохоор намайг гайхалтай байсан гэж ээж минь бодохгүй гэхээс би ямагт айдаг байв.

-Адал явдалт, тулаант киногоор нэгэнтээ олны танил болчихлоо. Калифорни мужийн амбан захирагчид нэр дэвших бодол танд бий юу?
-Үгүй шүү. Харин одоогийн амбан захирагч дахин кинонд тоглож байгаа гэж сонссон.

-Уилльям Х.Мэсигийн кинонд та тоглож байгаа гэсэн?
-Тийм ээ. Билл анхныхаа уран сайхны киног энэ жил олны хүртээл болгох гэж байгаа юм.

-Өмнө нь түүнтэй хамтран ажиллаж байв уу?
-Үгүй ээ. Энэ киногоор дамжуулан бид танилцаж, найзууд болоод байгаа. Билл дэлхий дээрх чадварлаг жүжигчдийн нэг. Тиймээс анхныхаа уран бүтээлд намайг тоглооч гэж урьсан нь миний хувьд нэр хүндийн хэрэг.