Онц хэрцгий аргаар хоёр хүнийг санаатай алсан гэмт хэрэг үйлдсэн Б овогтой И-гийн хэргийг шүүхэд шилжүүлжээ.

Тодруулбал, 2014 оны тавдугаар сарын 6-наас 7-нд шилжих шөнө Баянзүрх дүүргийн 9-р хороо, Давсны булаг дэлгүүрийн хойд зүгт Хар хошуу гэх газарт Б овогтой И нь хохирогч С овогтой Б-тэй үл ялих зүйлээр шалтаглан маргалдаж толгойн тус газарт нь чулуугаар олон удаа цохиж бусдыг санаатай алах гэмт хэргийг үйлдсэний гадна гэмт хэргийг нуун далдлах зорилгоор хамт явсан иргэн Б овогтой Х-ын толгойн тус газар чулуугаар мөн олон удаа цохиж, амь насыг нь хохироожээ.

Түүний үйлдсэн энэ хэрэгт дүүргийн нэгдүгээр прокурорын газраас Монгол Улсын эрүүгийн хуулийн тусгай ангийн 91 дүгээр зүйлийн 91.2.2, 91.2.6, 91.2.12, 91.2.16 дэх хэсэгт зааснаар 2015 оны хоёрдугаар сарын 6-ны өдөр прокурорын 108 дугаартай яллах дүгнэлт үйлдэж, 2015 оны хоёрдугаар сарын 13-ны өдөр хэргийг Дүүргийн эрүүгийн хэргийн анхан шатны нэгдүгээр шүүхэд хянан шийдвэрлүүлэхээр шилжүүлсэн байна.