"Онлайн яриа" булангийнхаа эхний зочноор Монголын лектор төвийн тэргүүн Ц.Баатархүүг оролцуулж байна. Бидний яриа "залуус" сэдвийн хүрээнд товчхон өрнөсөн юм.

-Таны бодлоор мөнгө гэж юу вэ. Залуусын санааг зовоох чухал зүйл мөн болов уу?
-Мөнгө хүний амьдралын дөрвөн чухал зүйлийн нэг болохоор л дургүй хүн байдаггүй юм шүү дээ. Эхлээд эрүүл мэнд тэгээд гэр бүл, ажил мэргэжил, дараа нь мөнгө байдаг. Гэхдээ хүн хамгийн түрүүнд өөрийгөө олох хэрэгтэй. "Би хэн бэ", "Юунд авьяастай, юу хийж чадах вэ" гэсэн асуултын хариуг хайх нь чухал.  Зарим залуус өөрийнхөө давуу талыг мэдээгүй байж мөнгө хайгаад, тэр нь үр дүнгүй болохоор сэтгэлээр унах тохиолдол байдаг.

-Манай залуусын багагүй хэсэг нь сэтгэлээр унасан үедээ архи уух, тамхи татах зэргээр өөрийгөө тайвшруулаад байх шиг санагддаг. Үүнд та ямар бодолтой байдаг вэ?
-Энэ буруу л даа. Миний хувьд сэтгэл тавгүй үедээ өөрийнхөө амжилттай, аз жаргалтай байсан үеэ боддог. Мөн өөрийгөө зоригжуулж, эрч хүч нэмэх үүднээс сайхан үгтэй ном шагайдаг. Энэ бүхэн надад тайвширал өгдөг юм.

-Аливаа зүйлд суралцахдаа хамгийн түрүүнд юуг анхаарах ёстой вэ?
-Ер нь одоогийн залуус хурдыг чухалчлах болжээ. "Хурдан л сурах юм сан" гэж их яардаг болж. Энэ нь зөв боловч нөгөө талаараа өөрийгөө хуураад байна уу даа гэж бодох юм. Ямарваа зүйлийг сурахад хамгийн гол нь чиглэл шүү дээ. Чиглэлээ зөв олчихвол болох байх аа. Би чиглэл, төлөвлөлт, хурд, манлайлал гэсэн дараалалтай явбал амжилтад хүрнэ гэж боддог.

-Хэл яриагаа зөв сайхан болгох хамгийн энгийн дасгал ч юм уу, хэллэг байдаг бол манай уншигчидтай хуваалцаач?
-Өглөө болгон "Жамц эмчийн цамц" гэдэг үгийг хэлж байвал хэл ярианы хөгжилд сайнаар нөлөөлдөг шүү.

Т.Батсайхан