Эзэн богд Чингис хааны өлгий нутаг хэнтийчүүд эрт дээр үеэсээ нутаг орныхоо уул усыг шүтэж, тахиж хайрлаж хамгаалж ирсэн олон сайхан түүхийн дурсгалт газруудтай. Үүний нэг болох аймгийн төвөөс 28 км орших "Өндөрхаан" хэмээх сүрлэг сайхан хайрхан байдгийг хэнтийчүүд төдийгүй түүгээр дайран өнгөрсөн хүн бүр мэддэг.

Энэхүү уул нь түүхийн олон сайхан үйл явдлаар дүүрэн хайрхан юм. Тухайн үед ууландаа зориулж "Суварга" хэмээх хийд 300 гаруй ламтай ном хурж байжээ. Хан хэнтий уулын салбарт орших эцэг өвгөдөөс шүтэж хайрлаж ирсэн ууландаа Улаанбаатар хот дах "Хэрлэн" сумын нутгийн зөвлөл, "Хан Хэнтий ирээдүй" ТББ-тай хамтран санаачилж иргэд олон нийтийн дэмжлэг туслалцаатайгаар нутаг усаа, уулынхаа савдагийг баясгасан "Бодь" суварга залж нутгийн олноо баясгасан сайн үйлст буяны ажлыг хийж байна.

Зуны эхэн сарын шинийн найман буюу энэ сарын 31-нд уулаа тахиж, суваргаа нээж бэсрэг наадам хийж нутгийн олноо баясгах юм.