Архангай аймгийн Хашаат сумын Цайдам багийн Шивээ толгой хэмээх газарт  2008 оны 8-р сард МУИС-ийн Нийгмийн шинжлэх ухааны сургуулийн Археологи, антропологийн тэнхимээс хийсэн  малтлагаар олдсон  хүн чулуу алга болсныг  2009 оны 5-р сарын 4-ны өдөр мэдсэн тухай тус сумын байгаль орчны хяналтын улсын байцаагч Б.Оюуннаран мэдээллээ.

Хүн чулууны толгой, цээж, суурин хэсгээрээ салсан байдалтай олдсон байна.
Шивээ толгойн булш нь Хөшөө Цайдамын Билгэ хаан болон Куль-Тегины цогцолбор дурсгал, түүнчлэн дундад эртний Монголын нийслэл Хар Хорумтай ойролцоо оршиж байсан тул түүхэн аль цаг үед холбогдох, ямар бүтэц зохион байгуулалттай дурсгал болохыг тодруулах зорилгоор малтлага хийсэн байна.

Хүн чулууны өндөр  нийтдээ 2м 10 см хэмжээтэй, алга болсон цээжин бие нь 1м 60 см орчим хэмжээтэй. Бор шар боржин чулуугаар хийсэн,400-500 кг орчим жинтэй, 5-7 хүн өргөж зөөхөөс нааш хөдөлгөхгүй гэж танилцууллаа. Судлаачид энэхүү дурсгалыг  түрэгийн үеийнх гэж үзэж байгаа юм байна.

Мэргэжлийн хяналтын ерөнхий газраас дээрх дурсгалын улсын хилээр хууль бусаар зөөвөрлөхөөс болгоомжлон мэдээллийг бүх боомтуудын хилийн мэргэжлийн хяналтын алба болон Гаалийн ерөнхий газар,  Эрүүгийн цагдаагийн газарт мэдэгдлээ.