Булган аймгийн төвийн I багийн Балгас хэмээх газарт амьдардаг иргэн Н.Мандахын хашаанд энэ сарын 16-ны өдөр нэг ятуу шувуу тодорхой бус шалтгаанаар үхсэн байжээ. Энэ мэдээллийн дагуу аймгийн Мал эмнэлгийн алба шуурхай ажилласан байна. Үхсэн шувуунаас түргэн тестийн аргаар шинжилгээ авахад шувууны томуу өвчин байж болзошгүй гэсэн онош гарчээ.

Үүссэн нөхцөл байдалтай холбогдуулан шинжилгээний сорьцыг баталгаажуулахын тулд үхсэн шувуунаас авсан дээжийг Улсын мал эмнэлэг ариун цэврийн төв лабораторт хүргүүлээд байгаа аж. Мөн шувуу үхсэн газрын ойр орчимд мэргэжлийн байгууллагууд ариутгал халдваргүйжүүлэлт хийж, тус багийн айл өрхүүдэд тандалт хийж байна.