Саяхан гялгар уутны хэрэглээг багасгах зорилготой хуулийн төслийг эрхэм гишүүд санаачлан, УИХ-аар хэлэлцүүлэхээр болсон билээ. Үнэхээр гялгар уут гэдэг хөдөө хотгүй тарж, байгальд шингэдэггүй энэ хог томоохон асуудлыг үүсгээд буй нь яалт ч үгүй үнэн.

Тэгвэл Чингэлтэй дүүрэг дэх мэргэжлийн хяналтын хэлтсээс пластик тор, уут, нэг удаагийн хэрэглээний хоолны савны үйлдвэрлэл, худалдаалалт, чанар аюулгүйн байдалд шалгалт хийжээ.

Шалгалтын явцад 56 худалдааны газруудад бүтээгдэхүүн савлаж, худалдаалж байсан 5000 уут, торыг хурааж авч арга хэмжээ авчээ. Мөн бидний хэлж заншсанаар 50 төгрөгийн тор, 20 төгрөгний нимгэн уутыг лабораторийн шинжилгээнд хамруулахад торны будгийн тогтворжилт нь эрүүл ахуйн зөвшөөрөгдөх хэмжээнд байжээ. Харин хорт бодисын хэмжээ нь эрүүл ахуйн зөвшөөрөгдөх хэмжээнээс 1.5 дахин их гарсан байна.

Энэ нь хүнсний бүтээгдэхүүний нийлэг сав, баглаа боодол-Техникийн ерөнхий шаардлагыг хангахгүй байжээ. Тиймээс “Нарантуул”, “Хархорин”, “Бөмбөгөр”, “Хүчит шонхор” худалдааны төвүүдэд бөөндөж буй БНХАУ-аас оруулж ирсэн чанарын баталгаажилт, дүгнэлтгүй, эрүүл ахуйн шаардлага хангахгүй гялгар уутыг таслан зогсоох шаардлагатай байгааг тус мэргэжлийн хяналтын хэлтсээс анхаарууллаа.

М.Жаргал