Олны дунд Хеф хэмээн алдаршсан өдгөө 83 настай энэ эрхэм 1926 оны энэ өдөр Чикаго хотод төржээ. Тэрбээр дунд сургууль төгсч, хожим нь цэргийн алба хаажээ. Их сургуульд сурч байхдаа психологи судалж, төгссөнийхөө дараа "Эсквайр" сэтгүүлийн газар рекламны албанд ажиллах болжээ. Энэ үед тэр "Би хонин сүргийн тоог цөөлөхийг хүссэн юм" хэмээх алдарт үгээ хэлсэн гэдэг. Түүний бодлоор өдөр тутам нэгэн хэвийн байдлаар амьдарч яваа эгэл хүмүүс хонин сүрэгтэй адил аж. Ингээд тэрбээр дур булаам үзэсгэлэнт хүүхнүүдийн зургаар чимэглэсэн, тансаг бараа бүтээгдэхүүн сурталчилсан сэтгүүл гаргахыг бодож олсон. Энэ нь "Плейбой" сэтгүүл байлаа. 1954 онд гаргасан анхны дугаарынх нь нүүрийг домогт Мерилин Монро чимжээ. Тухайн үед сэтгүүлийг "сексийн хувьсгал" боллоо гэж нэг хэсэг нь үзэж байхад зарим нь задгай зайдан явдлыг дэлгэн харуулсан гэж шүүмжилж байсан аж. Гэвч "Плейбой" сэтгүүл Хью Хефнерийг алдарт гаргаж, тэрбумтны эгнээнд оруулж чадсан юм.

Дашрамд сонирхуулахад, "Хеф" саяхан гэрээслэлээ бичсэн гэсэн мэдээлэл гарчээ. Төрсөн хүүхдүүддээ амиа тавьдаг Хефнер тэдэндээ их хэмжээний өв үлдээх нь тодорхой болсон. Харин өтөл насанд нь өөрийг нь цэнгүүлж жаргуулдаг долоон бүсгүйд ямар өв үлдээх нь олны анхаарлыг татдаг аж. Хамгийн сонирхолтой нь Хью Хефнер "Намайг Мэрилин Монрогийн дэргэд оршуулаарай" гэж захижээ.

Ц.Зул