АН-ын фракц хоорондын тэмцэл ямагт олны нүдэн дээр өрнөдөг. Н.Алтанхуяг, Д.Дорлигжав "Алтан гадас"-ынх, С.Ламбаа, Н.Батбаяр Мүдняк, Х.Баттулга, Ц.Элбэгдорж МоАХ-ных гээд АН-ын лидерүүдийн нэр ус, цол гуншин, хуваагдал нэгдлийг захын чавганц ч нэрлэнэ. Харин "АХ" намын хувьд бол байдал огт өөр. "АХ" намынхан газар цөмөрч галав юүлсэн ч олгой хагаравч тогоондоо гэх зарчмыг хатуу барьдаг. Тиймдээ МАХН дотор хичнээн фракц байдаг тэрэнд нь хэн хэн ордгийг улс төрийн хүрээнийхэн нь л гадарлана уу гэхээс олон нийт бол тэр болгоныг мэдэх ч үгүй.

МАХН-ын фракцын тухай олон нийтийн мэдээлэл бол "Элсний 13", "Жигүүрийнхэн", "Хотынхон" ерөнхийлөгчийнх Увсынх гээд л ерөнхийдөө паг болдог. Ер нь "АХ" намын фракцуудаас өдгөө М.Энхболдын буюу "Хотын" фракц хамгийн тогтвортой нь гэж улс төр судлаачид үзэж байгаа. Энэ фракцын лидер нь өдгөө шадар сайд бөгөөд бараг л Монгол улсын ерөнхий сайд. С.Баяр хөнгөн жаргалд автаж төрийн ажлыг умартахад ясны аж ахуйч М.Энхболд ар өврийг нь бөглөж суудаг.

Нэгэнт ажлын ихэнхийг нь нугалж байгаа болохоор танхимаа хэн хэнээр бүрдүүлэхийг М.Энхболдод бүрэн даатгасан гэх ч дэл сул яриа саарал ордноор тэнэдэг юм билээ. Хотынхоны хувьд том намын нөлөө бүхий фракц юм хойно эр бяр нь амтагдаа юм байлгүй өөрийнхөө хүнийг ерөнхийлөгчийн сонгуульд нэр дэвшүүлэхээр зүтгэж нэг үзэж. Гэвч М.Энхболд нь "Одоо цаг нь болоогүй. 2013 оныг харна" гэх лүндэн буулгасан юм байх. Ийнхүү хотын фракцынхан энэ удаагийн ерөнхийлөгчийн сонгуулийг өнжиж, дараагийн удаа цахиур хагалахаар алгаа үрж сууна.