ГХЯ, ЭМЯ, ЗТХЯ, БХБЯ, Эм, эмнэлгийн хэрэгслийн хяналт, зохицуулалтын газар, УБТЗ-ын удирдлагууд эм, эмнэлгийн хэрэгслийн хүрэлцээ, үүсээд байгаа нөхцөл байдал, хүндрэл, шуурхай татан авах талаар хуралдаж байна.

Гадаад харилцааны дэд сайд Б.Мөнхжин:

-Өнөөдөр ГХЯ-наас санаачилж хоёр хурлыг хийж байна. Эм, эмнэлгийн хэрэгсэл татан авах асуудлыг шийдвэрлэхэд санаа бодлоо нэгтгэж байна.

Холбогдох албаны хүмүүс болон хувийн хэвшлийнхэн шийдлүүдийг бий болгохоор санал дэвшүүлж байгаа юм. Энэ хэлэлцүүлгийн үр дүнд компаниуд бодит төсөөлөлтэй болно. Үдээс хойш барилгын компаниудын төлөөлөлтэй уулзана. Эрээн хотоос гадна бусад бүс нутгаас яаж татан авалт хийх талаар ярилцана.

Өчигдөр Засгийн газрын хуралдаанаар Гашуунсухайт, Ханги боомтоор эмийн бүтээгдэхүүн оруулж болох жагсаалтыг гаргасан. Энэ хоёр боомтоор эм, эмнэлгийн хэрэгсэл оруулж ирэх ажлыг зохион байгуулна.

Агаарын тээврээр ачааг авч болох ч өртөг өндөртэй байх болно. Хятадын талаас Ханги мандлын боомтоор Бугат хотоос автомашинаар эмнэлгийн хэрэгсэл тээвэрлэхийг зөвшөөрсөн.

-Өвлийн олимп болох хүртэл Эрээн хилээ нээхгүй гэх мэдээлэл байна. Иргэд өргөн хэрэглээний барааг нөөцлөх хандлага ч гарч байна.
-Гадаад улс ямар шийдвэр гаргахыг өмнөөс нь хэлэхэд хэцүү. Гэхдээ Эрээн хотын дотоод халдварын нөхцөл байдлаас маш их зүйл шалтгаална. Хэрвээ Эрээн хот халдвараа хяналтдаа авбал буцаад нөхцөл байдал шат дараатай энгийн байдалд шилжих боломжтой. Бусад орнуудад ийм үед panic-buying буюу хэт их худалдан авалт хийж, нөөцлөх асуудал үүссэн. Энэ нь аль аль талдаа сөрөг үр дагавартайг сүүлийн хоёр жилийн хугацаанд харлаа. Иргэдийг хэт их худалдан авалт хийхгүй байхыг зөвлөнө.