Шороон үхэр жилийн сар шинийн баяраар Хэнтий аймгийн Хэрлэн сумын нэгдүгээр багийн өндөр настан, 1939 оны Халх голын, 1945 оны чөлөөлөх дайнд оролцсон ахмад дайчин Г.Балдандорж гуайд орон сууцтай дүйцэхүйц хэмжээний 35 сая төгрөгийн мөнгөн тусламжийг Хэнтий аймгийн Засаг дарга Ч.Эрдэнэбаатар гардуулан өгчээ.

Энэхүү мөнгөн тусламжийг Монгол Улсын Ерөнхийлөгчийн 2008 оны зургаадугаар сарын нэгний өдрийн 170-р зарлигаар олгож байгаа билээ.

Хэнтий аймагт 1939 оны Халх голын, 1945 оны чөлөөлөх дайн болон баруун хязгаарт болсон зэвсэгт тулгаралтад оролцсон нийт 50 ахмад дайчин байгаагийн цор ганц нь буюу эдүгээ 91 нас сүүдэр зооглож буй Г.Балдандорж гуай л хоёр дайнд оролцсон ахмад дайчин ажээ. Тэрбээр 1937 онд зүүн хязгаарт байгуулагдсан Баянбүрдийн 24-р морьт отрядад 10 гаруй жил цэргийн алба хааж эх орныхоо тусгаар тогтнолын төлөө байлдааны 80 гаруй үүрэг гүйцэтгэж хоёр удаагийн байлдаанд мэргэн буудагч, холбоочноор оролцжээ. Дайны дараа аймгийн нийтийн аж ахуйн байгууллага, хот тохижуулах алба, тэрчлэн Өндөрхаан хотын орон сууц гудамжны хоёрдугаар хорооны даргаар 23 жил ажилласан байна. Ингэж ажиллахдаа Өндөрхаан хотоо тохижуулах анхны хар зургийг хийж хариуцсан хороогоо 17 удаа тэргүүний хэмжээнд удирдан ажиллаж байжээ.

Б.Адьяахүү