Иргэн С-ийг 2022 оны 10 дугаар сарын 03-ны орой "Тоёото приус-10” загварын тээврийн хэрэгслийг согтуугаар жолоодож явахад нь цагдаа саатуулжээ. Улмаар түүний тээврийн хэрэгсэл жолоодох эрхийг хасаж, торгох шийтгэл оногдуулсан байна.

Гэвч анхан шатны шүүх иргэн С-д оногдуулсан шийтгэлийн хуудсыг хүчингүй болгожээ. Учир нь иргэн С-ийн тээврийн хэрэгсэл жолоодох эрхийн үнэмлэхийн хүчинтэй байх 10 жилийн хугацаа 2021 оны 11 дүгээр сарын 03-ны өдөр дууссан. Өөрөөр хэлбэл, үнэмлэхийн хугацаа дууссан үед цагдаа жолооны эрхийг нь хасжээ. Гэвч цагдаагийн байгууллагын эрх бүхий албан тушаалтан А шүүхийн шийдвэрийг эс зөвшөөрч давж заалдах гомдол гаргасан байна.

Давж заалдах шатны шүүх хэрэгт авагдсан баримтыг хянаад цагдаа А нь иргэн С-ийг дээрх зөрчил гаргах үед тээврийн хэрэгсэл жолоодох эрхтэй гэж үзэн Зөрчлийн тухай хуулиар шийтгэл оногдуулсан. Энэ нь Зөрчлийн тухай хууль болон Замын хөдөлгөөний аюулгүй байдлын тухай хуулийг буруу тайлбарлан хэрэглэсэн гэж дүгнэв.

Цагдаагийн байгууллагын эрх бүхий албан тушаалтан А нь иргэн С-ийг тээврийн хэрэгсэл жолоодох эрхгүй гэж үзэн түүнд шийтгэл оногдуулах Зөрчлийн хэрэг нээж, албадлагын арга хэмжээ авахуулах саналын хамт эрүүгийн хэргийн шүүхэд хүргүүлэх ёстой байжээ. Иймд анхан шатны шүүхийн шийдвэрийг хэвээр үлдээн шийдвэрлэсэн байна.

Тойм бэлтгэсэн:  Сүхбаатар аймгийн Эрүү, Иргэний хэргийн давж заалдах шатны шүүхийн шүүгч О.Баатарсүх