Нийслэл Улаанбаатар хотын авто замын түгжрэлийг бууруулах Үндэсний хорооны III хуралдаан болж, Монгол Улсын сайд, Нийслэл Улаанбаатар хотын авто замын түгжрэлийг бууруулах Үндэсний хорооны дарга Ж.Сүхбаатар удирдан явууллаа. Энэ үеэр Нийслэлийн Бодлогын судалгаа, шинжилгээний төвийн гүйцэтгэх захирал Р.Дагва авто замын түгжрэлийг бууруулах богино болон дунд хугацааны бодлогын судалгааг танилцуулав.

Тэрбээр, Улаанбаатар хотод ерөнхий боловсролын 294 сургуульд 364 мянган хүүхэд сурч байна. 294 сургуулиас 158 нь төрийн өмчийн сургууль бөгөөд үүнд нийт сурагчдын 90 хувь буюу 310 мянган хүүхэд сурдаг. Дунд сургуулиудын суудлын ачаалал нэмэгдсэн. 

Харин хувийн 136 сургуульд 54 мянган сурагч сурдаг. Хотын хойд талын гэр хорооллын хэсэгт ерөнхий боловсролын 60 сургуульд байдаг ба 50 мянган хүүхдийн хүчин чадалтай. Одоо энэ 60 сургуульд 93 мянган хүүхэд суралцаж, хоёр дахин их ачаалалтай байна.

Гэвч хойд талын гэр хорооллын хэсэгт сургуулийн насны 184 мянган хүүхэд бий. 91 мянган хүүхдийг хотын төвийн сургууль руу зөөдөг, түгжрэл үүсгэдэг гэсэн үг. 

Тэгэхээр хотын хойд талын гэр хороололд нэмж олон сургууль барих шаардлага байна. Түгжрэлийг бууруулахын тулд авто зам нэмж барихаас илүү боловсролын салбарын шинэчлэл, сургалтын чанарыг дээшлүүлэх нь чухал гэсэн судалгааны дүн гарсан. 

960 хүүхдийн багтаамжтай нэг сургууль барихад дунджаар 10 тэрбум төгрөг шаардлагатай гэж үзвэл нийт 50 сургууль барих хэрэгцээ байна гэсэн үг. Үүнийг хэрэгжүүлбэл замын түгжрэл 16 хувиар буурах тооцоо гарсан гэж танилцуулав.