Муу нэрт, гайхал “өвчин” л дотоодын аялал жуулчлалын эдийн засгийн болоод нийгэм, соёлын эерэг болон сөрөг үг дагавруудыг ялган харах боломжийг олголоо гэхэд маргах хүн үгүй биз ээ. Урьд хожид дотоод аялал бас аялагчдын талаар судлах нь байтугай тоож хэлэлцсэн түүх их ховор юм. Ямар сайндаа, аялал жуулчлалын мэргэжилтэн бэлтгэдэг их дээд сургуулиудаас эхлээд хөтөч тайлбарлагч бэлтгэх түр сургалтын хөтөлбөрөөс ийм агуулга хайгаад ч олдохгүй!

Айлаар зүйрлэвэл, манай улсын аялал жуулчлал нь өөрийн хүүхдээ гадаа өлмөн, зэлмэн зогсоочоод, зочныхоо  хүүхдэд хамаг байдгаа дэлгэсэн мэт харагдана. Шууд утгаараа бол 2020 оныг хүртэл энэ салбарын мэргэжлийн ихэнх компаниуд нь зөвхөн гадаадын жуулчдад зориулан бүтээгдэхүүнээ хөгжүүлж, тэдэнд зориулан төрөл бүрийн контент бэлдсээр иржээ.

Гэтэл Монгол аялагчдыг маань голоогүй бусад орны мэргэжлийн байгууллагууд бидэнд зориулан маркетингийн компанит ажлаа тууштай зохион байгуулж чамгүй урсгалыг эх орондоо татаж, эдийн засгийн үр өгөөжийг хүртээд олон жилийг үдэж.

Бидний хөрш зэргэлдээ улсуудаас эхлээд аялал жуулчлалын салбараа эдийн засгийн тэргүүлэх чиглэлд барьж буй орнууд тэгвэл Дотоодын аялал жуулчлалаараа дамжуулан ямар ямар асуудлуудаа шийддэгийг харъя: (WTTC, 2020- Дэлхийн аялал, жуулчлалын зөвлөл)

• Улирлаас хамааралт байдлыг арилгах,
• Аялал жуулчлалын эвентүүдээ хөгжүүлэх,
• Дэд бүтцээ хөгжүүлж, хэт бөөгнөрлийг сааруулах,
• Ажлын байр бий болгож, эдийн засгаа эрчимжүүлэх,
• Гадаадын жуулчид төдийлөн тоогоод байдаггүй алс хөдөө тосгодоо хөгжүүлэх,
• Үндэсний соёлын онцлог, түүх, байгалийн үзэсгэлэнт газруудынхаа үнэ цэнийг залуу үедээ илүү ойлгуулах,

Дээр нь олон улсын аялал жуулчлалтай харьцуулахад дотоод аялал жуулчлал дараах давуу талуудтай: (WTO, 2020-Дэлхийн аялал жуулчлалын байгууллага)

• Ханшийн зөрүүд санаа зовох шаардлагагүй,
• Өөрийн эх хэл дээрээ үйлчилгээгээ авна,
• Соёлын ялгаа гарахгүй,
• Гадаад пасспорт, визний асуудалгүй тул илүү тухтай, илүү олуулаа хамрагддаг онцлогтой.

Дотоодын аялал жуулчлалыг хөгжүүлэх угтвар нөхцөлүүдийг дурдвал:  

• Газар нутаг том, соёлын болоод байгалийн контраст сайтай байх,
• Жуулчдад зориулсан үйлчилгээний байгууллагууд хөгжсөн байх,
• Хүн амын дундаж давхаргын эзлэх хувь багагүй байх.

Дотоодын аялал жуулчллын эдийн засгийн үр өгөөжийн талаарх мэдээлэл уншихыг хүсвэл ЭНД дарна уу.