Дижитал хамтлагийн дуучин Эркаг энэ удаагийн "Би-Өнөөдөр" булангийихаа зочноор урилаа.

-Дуучин Эрка өнөөдөр юу хийхээр төлөвлөж байгаа вэ?
-Зайсан толгойн урд "Чингисийн өргөө" нэртэй амралт чөлөөт цагийн цогцолбор нээлтээ хийх юм. Түүний нээлтэд оролцоно. Би соёл урлагийн ажлыг нь хариуцаж байгаа юм. Тэнд хэдэн шинэ хамтлаг танилцуулах ажилтай. Орой 18 цагаас нээлт нь болно. Тэр болтол ажлаа амжуулна даа.

-Хамтлаг, дуучид оролцож, ая дуугаа өргөнө биз дээ?
-Өө мэдээж урлаг соёлынхон оролцоно. Цөөн хэдэн уран бүтээлч ая дуугаа өргөх байх. Заавал очсон болгоныг дуул гээд байхгүй. Гэхдээ өөрөө дуулах сонирхолтой бол тайз бэлэн.

-Ойрдоо чимээгүй байгаад байх шиг. Шинэ уран бүтээл юу хийж байгаа вэ?
-Уран бүтээлээ хийж байгаа. Ирэх долоо хоногоос нэг шинэ дуугаа цацах гэж байна. Клип нь ч гэсэн бэлэн болсон байгаа.

-Поп дуу юу?
-Тийм, поп дуу. Киноны дуу байгаа юм. Өчигдөр орой дуугаа бэлэн болгоод, студиэс авсан байгаа. Ирэх долоо хоногийн эхээр л телевиз, радиогоор тараана даа.

-"Дижитал" хамтлаг хамтарч уран бүтээл хийх гэж байгаа сураг дуулдсан. Юу болсон бэ?
-Манай хамтлаг эргэж нэгдээд уран бүтээлээ хийж байгаа шүү дээ. Бид уран бүтээлийнхээ ажилд ороод эхэлчихсэн байгаа. Би дангаараа дуу хийж байгаа. Хамтлагийнхан ч гэсэн дан дангаараа дуу хийж байна. Мөн хамтлагаараа ч гэсэн дуугаа хийж байгаа.

-Тоглолт хийх ч сураг гарсан?
-Тоглолт хийх арай болоогүй. Эхлээд бүтэн цомгоо гаргах хэрэгтэй байна. Тэгээд хүмүүст дуугаа хүргэнэ. Тэгсний дараа л тоглолт хийнэ. Түүнээс дөнгөж уран бүтээлдээ ороод л тоглолт хийнэ гэж юу байх вэ дээ.

-"Дижитал"-ын шинэ уран бүтээлүүд ямаршуухан өнгө аястай байх вэ. Хуучны өнгө аясаараа дуулах уу?
-Хөгжмийн хэлбэрийн тал дээр цаг үеэ дагана. Арай өөр дуугаралттай байх болов уу. Түүнээс хамтлагийн хэлэх санаа, дуулах өнгө аяс хэвээрээ. Гэхдээ хуучин би л ганцаараа дахилт дуулдаг байсан бол одоо бүгд дахилтаа ээлжилж дуулах зэргээр уран бүтээлээ хийнэ дээ.

Н.Болд