Монголчууд нэг үеэ бодвол гадаадын хөрөнгийн биржээс хувьцаа худалдан авах нь нэмэгдэж ихсээд байна. Өмнө нь бид дотоодынхоо брокер-дилерийн компаниудаар дамжуулан гадаадын ижил төрлийн компаниудад данс нээлгэж, дэлхийн хөрөнгийн зах зээлд хөл тавьж, тэндээс хувьцаа худалдан авдаг байсан. Тэгвэл өнөөдөр монголчууд шинэ техник, технологи буюу арилжааны платформын ачаар Монгол хүн гэрээсээ дэлхийн хөрөнгийн зах зээлийн арилжаанд оролцох боломжтой болж байна.

Арилжааны ийм систем манайд нэлээдгүй нэвтрээд байна. Энэ системд холбогдохын тулд интернэтэд заавал холбогдсон байх шаардлагатай аж. Нэг ёсондоо интернэтээр дамжин хийгддэг аж. Энэ системийг эх орондоо оруулж ирж нэвтрүүлж эхлээд байгаа компаниудын нэг "Фронтер секрьютерс" ХХК-ийн андреррайтер н.Алтангэрэлээс уг программын талаар тодрууллаа.

-Манай энэ арилжааны платформ нь дэлхийн томоохон арилжааны системүүдэд холбогдсон юм. Үүгээр давуу талтай. Тиймээс үүнийг сонирхсон хүмүүс дуртай цагтаа компьютертээ уг сүлжээг үнэгүй шууд суулгаад арилжаанд оролцох боломжтой. Компьютерт суурилуулахад үнэ төлбөргүй, манай сайтаас (fronier.mn) шууд татаад авч болно. Ингэснээр дэлхийн хөрөнгийн биржүүд дээр явагдаж буй арилжаанд оролцох юм.

Гэхдээ нэгэнтээ хувьцаа байхгүй тохиолдолд дадлагын арилжаанд оролцож түүнийг хийх боломжтой. Дадлагын арилжааны үнэ ханш нь жинхэнэ зах зээлийнхээ ханшаар явагддаг. Харин арилжаанд оролцож буй мөнгө нь хийсвэр байдаг. Нэг ёсондоо бодит биш мөнгө юм.

Манай платформыг суулгаснаар гадаадынхаас гадна өөрийн орны Монголын Хөрөнгийн бирж дээрх арилжаанд мөн оролцож болох уу, эсвэл дунд нь заавал аль нэг брокер-дилерийн компаниар дамжуулж зуучлуулах уу гэж хүмүүс асуудаг. Энэ платформоор манай Хөрөнгийн биржийн арилжаанд орохгүй, Хонгконг, Нью-Йорк, Торонто зэрэг олон улсын хөрөнгийн биржүүдийн арилжаанд оролцоно. Учир нь манай Хөрөнгийн биржийн арилжаа олон улсын хөрөнгийн биржүүдийн сүлжээ системд хараахан ороогүй, хамрагдаагүй байгаа юм.

Удахгүй Монголын Хөрөнгийн бирж олон улсын системд нэгдчихвэл манай платформоор арилжаанд оролцож, хийж болно гэв.

Дээрх системийг гадаадын арилжааны банкууд болон олон улсын мэдээллийн агентлагууд түгээмэл хэрэглэж, ашигладаг аж. Манайд дээрх системийг ашиглах явцад гарч болох ганц эрсдэл нь цахилгааны саатлаас болж гацах явдал гарч болох нь. Тиймээс интернэтийн холболтоо сайн хийх хэрэгтэй гэж мэргэжилтнүүд зөвлөж байна.