Засгийн газрын Хэрэг эрхлэх газрын дэд дарга бөгөөд Засгийн газрын Хяналт хэрэгжүүлэх газрын дарга Б.Баасандорж мэдээлэл хийж байна.

Б.Баасандорж: Сэргэлтийн бодлогын хүрээнд Засгийн газрын Хяналт хэрэгжүүлэх газар энэ оны нэгдүгээр сарын 1-нээс эхлэн үйл ажиллагаагаа явуулж эхэлсэн бөгөөд тус байгууллагын гол зорилго нь Засгийн газрын оновчтой, үр ашигтай, ухаалаг засаглалыг бэхжүүлэх.

Байгууллагын гол үндсэн үйл ажиллагаа нь ЗГ-ын 16 яам, 49 агентлаг, бүх шатны аймаг, нийслэлийн Засаг дарга, УТҮГ, ТӨҮГ-уудад иргэд, олон нийтээс ирсэн өргөдөл, гомдол, олон нийтээс шүгэл үлээж байгаа байдал зэргийг хүлээн авч тухайн байгууллагын сахилга, хариуцлагыг дээшлүүлэх, бүтээмжийг нэмэгдүүлэх, хууль тогтоомж хэрэгжүүлэх үйл ажиллагаанд хяналт тавих, төрийн үйлчилгээний чанар хүртээмжийг дээшлүүлэх зэрэг ажлуудыг хийнэ.

Дээрх үйл ажиллагаанууд дээр үнэлгээ, мониторинг, тандалт-судалгаа хийнэ. Мөн шаардлагатай тохиолдолд иргэдийн өргөдөл гомдолд суурилж хяналт шалгалтын ажлыг хийнэ. Байгууллагын менежментийн хувьд дарга төвтэй тогтолцооноос татгалзаж байгаа. Тамгын газрын дарга, Хяналт шинжилгээ, үнэлгээний дарга зэрэг албан тушаал бий. Засгийн газрын хяналт хэрэгжүүлэх газарт ямар ч даргын албан тушаал байхгүй. Харин бид багаар ажиллах зарчимд суурилан байгууллагын үнэт зүйлийг эрхэмлэх бүтэцтэй. Үнэлгээ мониторингийн баг, тандалт судалгааны баг, хяналт шалгалтын баг, хуулийн баг, менежментийн баг, дотоод хяналтын баг гэсэн зургаан багаас бүрдэж буй. 

Үүнтэй холбогдуулан Засгийн газрын хяналт хэрэгжүүлэх газар 45 ажлын байрны нээлттэй сонгон шалгаруулалтыг зарлаж байна. Нээлттэй сонгон шалгаруулалтыг энэ сарын 13-наас зарласан бөгөөд шалгалтыг ирэх сарын 14-нд авна.