Дэлхийн оюуны өмчийн өдөр өнөөдөр тохиож байна. Энэ өдөр "Монгол Контент" ХХК Оюуны өмчийн газартай хамтран ажиллах гэрээ байгуулж, оюуны өмчийн зуучлагчийн эрхээ авлаа.

Оюуны Өмчийн Зуучлагч нь уран бүтээлчдийн оюуны бүтээлийг эдийн засгийн эргэлтэд оруулж, зах зээлд түгээх, уран бүтээлч түүнээсээ нэмэлт орлого олох нөхцөлийг бүрдүүлэх үйлчилгээ үзүүлэх юм. Өөрөөр хэлбэл дуучид, уран бүтээлчдийн эрх ашгийг хамгаалж, контентыг нь зуучлан борлуулах бөгөөд зохиогч нь бүтээлээсээ үр шимийг нь хүртэх, мэргэжлийн үнэлгээгээр баталгаажсан бүтээлээсээ хувьцаа эзэмших, лицензийн гэрээгээр ашиглуулах, барьцаалж зээл авах ч боломж эрх зүйн орчинд бүрдэж байгаа юм.

Ийнхүү "Монгол Контент" ХХК энэ төрлийн зуучлагчийн эрхийг авч буй Монголын хамгийн анхны компани боллоо. Монгол Контент ХХК нь өнөөдрийн байдлаар 500 гаруй эрх эзэмшигчтэй хамтран ажиллаж байна. Үүнд хамтлаг, дуучин, уран бүтээлчдээс гадна студи, продакшн, лэбэлүүд багтдаг ба төрөл бүрийн урсгал, жанрын мянга гаруй уран бүтээлчийн 18 мянга орчим дуу, хөгжмийг Монголын үүрэн холбооны дөрвөн оператор болон БНХАУ -ын ӨМӨЗО-ы “Шэньжян Эгшиг Соёл Медиа” компаний “Эгшиг” хөгжмийн үйлчилгээнд гэрээт уран бүтээлчдийн дуу хөгжмийг нийлүүлэн ажилладаг юм.

"БИДНИЙ ЗОРИЛГО ОЮУНЫ ӨМЧИТ БҮТЭЭЛИЙГ ХАМГААЛАХ, ЭДИЙН ЗАСГИЙН ЭРГЭЛТЭД ОРУУЛЖ, УРАН БҮТЭЭЛЧДЭД НЭМЭЛТ ОРЛОГЫГ БИЙ БОЛГОХОД ЧИГЛЭНЭ"

"Монгол Контент ХХК"-ний Гүйцэтгэх захирал Э.Чинзориг:
- "Монгол Контент ХХК" нь 2015 оноос гэрээт уран бүтээлчид, контентын сан дээрээ тулгуурлан Music distribution буюу дуу хөгжмийн түгээлтийн үйлчилгээг  эхлүүлэн уран бүтээлчдийн бүтээлийг дуу хөгжим ашиглагч бүхий л байгууллагуудад нийлүүлэх боломжтой үйл ажиллагааг явуулж байна. Мөн Монголын оюуны өмчит 18 мянган контентыг ӨМӨЗО-ны “Эгшиг” платформоор дамжуулж  борлуулдаг.

Түүнээс гадна бидний эрхлэн явуулдаг www.mongolmusic.mn сайтаар  дамжуулан уран бүтээлчид гэрээ байгуулах, уран бүтээлээ нийлүүлэх, уран бүтээлийн сонссон тоо,  олсон орлогоо ил тод “шилэн” байдлаар харах боломжтой юм. Бидний зорилго бол Монгол Улсдаа оюуны өмчит бүтээлийг хамгаалах, түүнийг эдийн засгийн эргэлтэд оруулж, хамтлаг дуучид, уран бүтээлчдэд хэрхэн нэмэлт орлогыг бий болгох, тэднийг уран бүтээлдээ 100 хувь төвлөрч, чанартай бүтээл гарах нөхцөлийг нь бүрдүүлэх, оюуны өмчтэй холбоотой тулгамдаж буй асуудлыг нь шийдвэрлэх, энэ талын мэдлэг, мэдээллийг нь дээшлүүлэхэд чиглэж байна.

Мөн цаашдаа стриминг үйлчилгээг нэвтрүүлж, зөвшөөрөлгүй зарагдаж байгаа контентуудыг Оюуны өмчийн газартай хамтран цэгцэлж, журамлах томоохон ажил бидний өмнө бий. Цаашлаад олон улсын байгууллагатай хамтрах, гишүүнчлэлээр элсэх тохиолдолд монгол контентуудыг олон улсад ашиглах тохиолдолд орлого хуваарилах гэх мэтээр дэлхийн зах зээлд орох алсын бодлоготойгоор энэхүү хамтын ажиллагааг эхлүүлж байна.

“ЗОХИОГЧ ӨӨРӨӨ БҮТЭЭЛЭЭ ЗАХ ЗЭЭЛД НИЙЛҮҮЛЭХ ГЭЭД ЯВАХ НЬ ТӨДИЙЛӨН АМЖИЛТТАЙ БОЛДОГГҮЙ”

Оюуны өмчийн газрын Захиргаа удирдлагын хэлтсийн дарга Д.Амгалан:
- "Монгол Контент" ХХК нь Монгол Улсдаа дуу хөгжим, урлагийн бүтээл бүхий контент зуучлагч анхны компани болж байна. Монголын Оюуны өмчийн тухай хуульд зааснаар оюуны өмчийн харилцаа нь төрийн болон төрийн бус байгууллага, аж ахуй нэгж, иргэдийн хамтын ажиллагаанд суурилж явдаг зарчимтай. Тиймээс энэ салбарт үйл ажиллагаа явуулж байгаа байгууллагуудаа дэмжин, бүх талаар хамтарч ажиллаж, нээлттэй үйл ажиллагаа явуулах бодлого барин ажиллаж байна.

Бид хамтран ажиллах гэрээ байгуулснаар Оюуны өмчийн тухай хуулийн дагуу  эрх зүйн орчинд оюуны өмчийн зуучлагч бүхий шинэ оролцогч тал бий болж байгаа юм. Нөгөөтээгүүр зохиогч өөрөө бүтээлээ зах зээлд нийлүүлэх гээд явах нь төдийлөн амжилттай болдоггүй нь өнгөрсөн хугацаанд нотлогдсон. Харин зуучлалын үйл ажиллагаа явуулж буй албан ёсны байгууллагад хандан өөрийн оюуны бүтээлээ эдийн засгийн эргэлтэд оруулах нь илүү ач холбогдолтой.

Мөн Оюуны өмчийн газрын бодлого нь албан ёсны зуучлалын үйл ажиллагаа эрхэлж байгаа байгууллагуудаа хооронд нь холбож, хамтран ажиллах нөхцөлийг бүрдүүлж урлаг, утга зохиол, дуу хөгжмийн контентууд нь зохиогчийн эрхийн зөвшөөрөлтэйгөөр фм, радио, караоке, телевизүүдээр цацагддаг байх хууль ёсны тогтолцоог нэвтрүүлэхэд чиглэнэ. Мөн цаашлаад шаардлагатай мэдлэг, мэдээллийг нь өгч, чадавхжуулаад салбарын мэргэшсэн оролцогч болох  ч ач холбогдолтой.