Тэрээр өөрийн эзэмшсэн мэргэжлээ зурхайн шинжлэх ухаантай хослуулан аврал эрэгч хүмүүний тусын тулд ажилласаар яваа. Өдгөө 72 насыг насалсан алтан гартантай уншигч таныг уулзуулъя.

-Та ардын уламжлалт эмчилгээгээр эмчилдэг хүн. Ардын уламжлалт эмчилгээгээр ямар ямар өвчнийг анагаадаг вэ?
-Би энэ дагуу олон жил ажилласан. Ардын уламжлалт эмчилгээгээр олон төрлийн эмчилгээг эмчилж, эдгээж болдог. Тухайлбал шаргалжуутын хар хадны рашаан байна. Энэ нь зөв хэрэглэх юм бол ходоодны ракыг ч эмчилнэ. Хүний насыг ч уртасгадаг. Малын цөс бол идээт өвчинд маш сайн. Мөн галзуурсан хүнд өмхий хүрэнгийн мах ч сайн үр дүнтэй.

-Галзуурсан хүнд өмхий хүрэнгийн махыг утаж өгдөг гэлээ. Үүнийг ямар хэмжээгээр өгдөг юм бол...
-Тэмээний хорголын чинээтэй байхад зөндөө их утна. 50-100 гр мах иднэ. Энэ бол маш сайн. Орон дээр баглаатай хүнд өгөхөд л дороо сэргээд ирдэг. Би хөдөө орон нутагт олон жил ажилласан болохоор нэлээд туршлага суусан. Тиймээс л түмэн олонд тус болдог болов уу гэж л ийм зүйлүүдийг судлаж суудаг юм.

-Сүүлийн үед манайд ямар өвчин зонхилж байна?
-Зүрх судас, бөөр, элэгний өвчин илүү их тусаад байна. Тэр дундаа бөөрний өвчин. Энэ нь юутай холбоотой вэ гэхээр сүүлийн үед хүүхэд залуус доороосоо ерөөсөө дулаалахгүй байна. Маш их даардаг. Үүнээс болж таван махбодид өөрчлөлт ороод байна шүү дээ. Идэш уушгаа зөв, зохистой хэрэглэхгүй байна. Мөн хөдөлгөөн дутагдаж байна.

-Элэгний өвчинд ардын эмчилгээ хэр үр дүнтэй вэ?
-Ардын эмнэлэг талаас олон эмчилгээ бий. Хүмүүс ам сайтай л байдаг. Минийхээр бол элэгний өвчинд мөн шар өвчинг дөнгөж эхлэхэд нь хөх дэгд гэж ургамлыг уухад нэн сайн.

-Сүүлийн үед хүүхэд, залуус нүдний хараа султай болж байна гэж нүдний эмч нар ярьдаг. Ардын ямар эмчилгээ нүдний хараанд тустай вэ?
-Нүдний хараа маш муудаж байна. Зарим нь бүр хараагүй болсон байх жишээтэй. Сарьсан багваахайн мах чанаж идээд, шүүсийг нь уугаад нүд рүүгээ дусаахад ямар ч байсан орчлонг хараад байж болно. Би энэ эмчилгээгээр хэд хэдэн хүнд тус хүргэсэн. Ямар ч байсан нүдгүй болчоогүй байгаа.

-Танаас хүмүүс хэр их зөвлөгөө авдаг вэ?
-Авна аа. Саяхан нэг хүн цагаан мах гараад байна гэж ирсэн. Цагаан мах гараад байвал маарганцтай бүлээн уусмалд суухад тустай байдаг. Ямар ч өвчний талаар асуусан би анхны тусламж өгж чадна.

-Сүрьеэ өвчнийг эмээр эдгээдэг гэдэг. Харин ардын эмчилгээгээр энэ өвчин эдгэрэх үү?
-Сүрьеэ өвчинд тарваганы цэвэр тос маш сайн. Надтай ажиллаж байсан нэг нөхөр сүрьеэ тусаад, цус алдаад үхэх шахсан. Тэр хүн тарваганы тос уугаад ор мөргүй эдгэрсэн.

-Ардын эмчилгээ хийдэг хүмүүс дом хийдэг юм билээ. Энэ нь ямар тустай юм бэ?
-Дом гэдэг бол урьдын ер бусын арга юм л даа. Мөн тарни уншиж өвчин эдгээдэг. Домын хүч янз янзын юм байдаг. Зарим нь бүр худлаа байх гэмээр. Жишээ нь дээр үед хүн төрөх гээд төрж чадахгүй байвал тулганы доорхи шороог, голомтны шороотой хольж буцалгаж өгөхөөр хүүхэд хурдан төрнө. Төрөхдөө зулай дээр нь шороо наалдаж төрдөг гэнэ. Ийм зүйлийг л дом гэнэ дээ.

Ярилцсан Н.Галбаатар