Хүүхдийн эрхийн тухай хууль, Үндэсний их баяр наадмын тухай хууль, бусад холбогдох хууль, тогтоомжийг удирдлага болгон хурдан морины уралдаан болон морины сунгаа, уралдааны бэлтгэлийн үед уралдаанч хүүхдийн эрх, амь нас, эрүүл мэнд, аюулгүй байдлыг хангах зорилгоор өнөөдөр ГБХНХ-ын сайд Т.Аубакир болон ММСУХ-ны Ерөнхий нарийн бичгийн дарга Ц.Ганбаяр нар санамж бичиг байгуулав. 

Санамж бичиг байгуулах үйл ажиллагаанд ХГБХХЕГ-ын дарга Б.Баярсайхан, ГБХНХЯ-ны Гэр бүлийн бодлогын газрын дарга Ц.Мөнхзул, бусад холбогдох албаны хүмүүс, байгууллагууд оролцлоо. 

Энэхүү санамж бичигт хурдан морины уралдаан болон сунгаа бэлтгэлийн үед уралдаанч хүүхдийн эрх, амь нас эрүүл мэнд, аюулгүй байдал, сурч боловсрох эрхийг нэн тэргүүнд тавьж, хүүхдийн сайн сайхан байдлыг хангах, хууль тогтоомжийг мөрдөж, захиргааны хэмжээний акт хэлэлцээрээр хүлээсэн үүргээ биелүүлж,ажиллах талаар тусгажээ.  

Хурдан морины уралдаан болон морины сунгаа, бэлтгэлийн үед уралдаанч хүүхдийн эрх, амь нас, эрүүл мэнд, аюулгүй байдал,сурч боловсрох эрхийг нэн тэргүүнд тавьж, стандартын шаардлага хангасан хамгаалалтын хувцас, хэрэгслээр ханган холбогдох хууль, дүрэм журмыг хэрэгжүүлж, хамтран ажиллахаа талууд илэрхийлэв. 

 Гэр бүл, хөдөлмөр, нийгмийн хамгааллын сайд Т.Аубакир “Наадмын өдрүүдэд бүх аймаг, суманд маш олон хүүхэд морь унадаг. Тэдний эрүүл мэнд, аюулгүй байдлыг уяачид хангаж ажиллах ёстой” гэдгийг сануулж, унаач хүүхдийн эрүүл мэнд, аюулгүй байдлыг нэн тэргүүнд тавьж, өв соёлоо дээдлэн сайхан наадахыг уриалсан юм. Гэр бүл, хөдөлмөр, нийгмийн хамгааллын яам бүх хороо, сумдад ажиллаж буй Хүүхэд, гэр бүлийн асуудал хариуцсан нийгмийн ажилтнуудаар дамжуулан улсын болон аймаг, сумдын наадмын салбар хороод, комисст шаардлага тавьж унаач хүүхдүүдийн аюулгүй байдалд анхаарч ажиллах юм.

Эх сурвалж: ГБХНХЯ