Умард Солонгосын удирдагч Ким Жон Ун ирэх долоо хоногт БНХАУ-ын Бээжин хотноо болох цэргийн парадад оролцохоор болжээ.

Тэрбээр сүүлд зургаан жилийн өмнө Хятадад айлчилж байсан юм. Энэ парадад ОХУ-ын ерөнхийлөгч Владимир Путин мөн оролцох аж.

Ши Жиньпин, Владимир Путин, Ким Жон Ун нар нэгэн зэрэг уулзаж буй анхны тохиолдол энэ болох юм.

Ким Жон Уны хувьд 2011 онд улсын эрхийг авснаас хойш анх удаа гадаадын томоохон удирдагчидтай нэгэн зэрэг уулзаж буй тохиолдол болж байна.

Умардын удирдагч өнгөрсөн хугацаанд Ши Жиньпин, Путин, Трамп, Өмнөд Солонгосын ерөнхийлөгч асан Мүн Жэ Ин тэргүүтэй удирдагчидтай хоёр талын уулзалт л хийж байсан юм.

Харин энэ удаагийн уулзалтад Иран, Беларус, Серби, Куба, Индонез, Мьянмар, Пакистан зэрэг 26 улсын төлөөлөгчид нэг дор чуулна.

Шинжээчид Ким Жон Уныг ОХУ-тай харилцаагаа гүнзгийрүүлснээс хойш бусад улстай ч мөн харилцаагаа тэлэх хандлагатай байна гэж үзэж байна.

Умард Солонгос Украинд хийж буй дайнд Оросын талд дэмжлэг үзүүлж, цэрэг, зэвсгээ нийлүүлж хариуд нь эдийн засгийн тусламж авч буй. 

Саяхан АНУ-д Өмнөд Солонгосын ерөнхийлөгч айлчилсан бөгөөд энэ үеэр Трамп Ким Жон Унтай энэ жил уулзах хүсэлтэй байгаагаа илэрхийлсэн юм.

Эх сурвалж: АР