Уншигч та бүхэнд долоон настайгаасаа үеийнхээ хүүхдүүдэд англи хэл зааж эхэлсэн Г.Цэлмүүнийг танилцуулъя. Түүний фэйсбүүк хуудас 50 мянга гаруй дагагчтай. Төдий хэмжээний олон хүүхдэд сургалтаа хүргэсэн бяцхан сургагч багш юм.

Түүний хичээлүүдийг дөрвөөс дээш настай хүүхдүүд үзэх боломжтой ба Шинэ Зеландын 1-р ангийн хүүхдүүдийн хичээлийн хөтөлбөрт суурилан сургалтын хичээлүүдээ бүтээжээ.

Тэрээр одоо 10 настай. “Гленфилд” бага сургуульд сурдаг. Шинэ Зеланд Улсад гэр бүлийнхнийхээ хамт амьдардаг. Ингээд түүнтэй цахимаар холбогдон цөөн хором ярилцсаныг хүргэж байна.

-Хэзээнээс англи хэлийг зааж, үеийнхэндээ багш болж эхэлсэн бэ?
-Намайг долоон настай байхад ээж маань надаас монгол хүүхдүүдэд англи хэл заахыг хүсэж байна уу гэж асуусан. Би мэдээж чадна гэдгээ хэлээд баяртайгаар зөвшөөрсөн. Тэгээд өөрийн сургалтаа явуулж эхэлсэн. Гэр бүлийнхэн маань надаар маш их бахархаж, үргэлж дэмждэг. Би Шинэ Зеландад төрж, өссөн болохоор байнга англиар ярьдаг. Тиймээс үеийнхээ монгол хүүхдүүд англи хэлийг сурахад нь бага ч болов туслахаар өөрийн сургалтаа эхлүүлж байсан.

-Өөрийнхөө цахим суваг болон, веб сайтыг хэрхэн хөтөлдөг вэ. Их бүтээлч харагдсан?
-Ээж болон ээжийн найз Оюунаа эгч бид хэд хамтдаа цахим сувагтаа юу нийтлэхээ ярилцдаг. Ингээд уншлага, ярилцлага болон бусад зүйлсийг Оюунаа эгч нийтэлж өгдөг. Би ням гараг бүр хүүхдүүдтэй ярилцахаар Оюунаа эгчийн гэрт очдог.

-Англи хэлийг сурахаас айж, хэцүү гэж бодож байгаа хүүхдүүдэд юу гэж зөвлөх вэ?
-Англи хэл сурах гэж айж эмээх хэрэггүй. Миний вэбсайт руу ороод өөрт хэрэгтэй олон мэдээлэл, хичээлийг үзэх боломжтой. Би англи хэлний боловсролыг Шинэ Зеландад сурсан. Тиймээс эндээс сурч мэдсэн зүйлээ вэб хуудсаараа дамжуулан монгол хүүхдүүддээ зориулан заадаг.

-Ирээдүйн зорилго, мөрөөдлийнхөө талаар хуваалцвал?
-Ирээдүйд би шүүгчээр ажиллах эсвэл netball-ийн тоглогч болохыг хүсдэг.