УИХ-ын гишүүн Х.Ганхуяг, Х.Булгантуяа нар Хөрөнгө оруулалтын хуулийн талаар мэдээлэл хийж байна.

УИХ-ын гишүүн Х.Ганхуяг санаачилж, Х.Булгантуяа, Д.Өнөрболор, П.Анужин нар хамтран Хөрөнгө оруулалтын тухай хуулийн төслийг боловсруулан, УИХ-ын даргад өргөн барьсан.

Гэвч Д.Өнөрболор, П.Анужин нар хуулийн төслийг боловсруулах явцад тэдний оролцоог хангаагүй, тэдний дэмжээгүй заалтуудыг төсөлд оруулсан хэмээн хуулийн төслийг буцаан татахыг хүссэн юм.

УИХ-ын гишүүн Х.Ганхуяг:

-Хөрөнгө оруулалтын тухай хуульд нэмэлт өөрчлөлт оруулах шалтгаан нь Монгол Улсад бизнес хөрөнгө оруулалт хийх үүд хаалгыг нээж өгөхийг зорьсон.

Энэ хуульд гадаадын хөрөнгө оруулагч болон түүний гэр бүл Монголд байнга оршин суух эрх авах бол хөрөнгө оруулалтын доод хэмжээ 50 мянган ам.доллар байна гэж тусгасан. Үүний гол агуулга нь гадаад, монгол иргэд хамтарсан компани байгуулах боломжийг бүрдүүлнэ гэсэн үг. Тиймээс 100 мянган ам.долларын асуудлыг зөв ойлгох хэрэгтэй.

Монгол Улсын эдийн засгийг хөгжүүлэхийн төлөө энэ хуулийн төслийг өргөн барьсан. Залуу гишүүдийг зүгээр суу гэж сонгоогүй шүү дээ.

УИХ-ын гишүүн Х.Булгантуяа:

-Бид энэ хуультай холбоотой мэдээллийг төдийлөн сайн өгч чадсангүй гэж дүгнэж байна. Гадаадын иргэн харьяаттай холбоотой асуудал дээр 500-1 сая долларын хөрөнгө оруулалт хийсэн ч бай байнгын амьдрах эрх үүсдэггүй. Монгол Улсад виз мэдүүлэхэд өгөхгүй байх эрхтэй. Яагаад гэдэгт тайлбарт өгөх шаардлагагүй.

Монгол Улсын ГИХГ 300 орчим хүнтэйгээр хилээр ямар хүн ирж байна вэ гэдгийг хянаж ажилладаг. Дипломат албанаас бусад шалтгаанаар амьдарч байгаа иргэд Монгол Улсын нийт хүн амын гурван хувиас хэтрэхгүй гэж заасан.

Тэгэхээр энэ хуулийг баталснаар хэчнээн саяар гадаадын иргэд орж ирнэ гэж ойлгож болохгүй. Монгол Улс тусгаар тогтносон орон. Түр болон байнгын оршин суух, орж ирэх виз, байнгын оршин суух эрх гээд олон шаардлага бий.

УИХ-ын гишүүн Х.Ганхуяг:

-МҮХАҮТ-д тавдугаар сарын 26-нд хуулийн төслөө танилцуулсан. Тэнд УИХ-ын гишүүн Д.Өнөрболор өөрөө байсан. Ингээд зургадугаар сард өргөн барьсан.