Монголын талаас нийт 23 нэр төрлийн бараа, бүтээгдэхүүнийг жагсаалтаас хасах хүсэлт гаргажээ.

Евразийн Эдийн Засгийн Холбоотой байгуулах Чөлөөт худалдааны түр хэлэлцээрийн хүрээнд Монголын талаас 366 бараа, бүтээгдэхүүний жагсаалтыг тохиролцсоныг Эдийн засаг, хөгжлийн яам мэдээллээ.

Стратегийн гол нэрийн хүнсний бүтээгдэхүүнээс улаанбуудайны импортод нийт 50 мянган тонны квот тогтоож, тарифыг 25 хувиар бууруулан, 3.75 хувиар тогтоохоор болсон байна. Өндөгний хувьд 90 сая ширхэг хүртэл тарифыг 50 хувиар бууруулж, 7.5 хувийн татвар ногдуулна. 

Түүнээс дээш бол одоогийнхоор 15 хувийн татвар төлнө. Өнгөрсөн онд Монгол Улс 98.3 сая ширхэг өндгийг 9.7 сая ам.доллароор импортолжээ. Үндэсний үйлдвэрлэгчдээс “Түмэн шувуут” ХК 143.8 сая ширхэг өндөг үйлдвэрлэснээ мэдээлсэн юм.

2024 онд 317.7 мянган га-д улаанбуудай тариалж, 397.3 мянган тонныг хураан авсан нь өмнөх оноос 10.4 хувиар буурсан байна. Харин 88 орчим мянган тонн улаанбуудай импортолсон нь өмнөх оноосоо 80 гаруй хувиар өссөнийг Гаалийн ерөнхий газрын мэдээллээс харж болохоор байгаа юм.

Үүнээс гадна бяслаг, цөцгийн тосонд 7.5 хувийн тариф ногдуулсан бол хуурай сүүний тарифыг тэглэсэн байна. Харилцан ашигтай байх үүднээс Монголоос экспортлох цагаан архи болон шар айргийн тарифыг 25 хувиар хөнгөлж, 18.7-30 хувийн татвар ногдуулахаар болжээ.

Монголын талаас нийт 23 нэр төрлийн бараа, бүтээгдэхүүнийг жагсаалтаас хасах хүсэлт гаргаснаас шингэн болон өтгөрүүлсэн сүү, төмс, лууван зэрэг найман бүтээгдэхүүнийг хассан аж. Харин йогурт, жигнэмэг, өрмөнцөр, эрдэст усыг хасахаас татгалзсан байна.

Чөлөөт худалдааны хэлэлцээрийг баталснаар Монголын аж ахуйн нэгжүүд нэг жилд багадаа 16.6 сая ам.долларын гаалийн татвар тэглүүлэх тооцоо байгааг Эдийн засаг, хөгжлийн яам тодотголоо.

Чөлөөт худалдааны түр хэлэлцээрийг өнгөрсөн оны 12 дугаар сард байгуулах байсан ч үндэсний үйлдвэрлэгчдийн саналыг тусгах, дотоодын зах зээлээ хамгаалах талаар нэмж судалгаа хийсний дараа байгуулахаар түр хойшлуулаад байгаа юм.