Монголын ойн салбарын шинэчлэл сэдэвт сургалт өнөөдөр боллоо.

Сургалтыг Словенийн элчин сайдын яамны дэмжлэгээр хэрэгжүүлж буй “Монголын ойн салбарын шинэчлэл” төслийн хүрээнд, Монголд ойн салбар үүсэж хөгжсөний 100 жилийн ойд зориулан зохион байгуулж байна.  

Сургалтаар ой, модны салбарын эмэгтэйчүүд, мэргэжилтнүүдийг чадавхжуулах, хамтын ажиллагааг бэхжүүлэх, түншлэл хөгжүүлэх, мэдлэг, чадвараа хуваалцах боломжийг бүрдүүлэхийг зорьжээ.  

Түүнчлэн, энэ салбарт ажиллаж буй эмэгтэйчүүдийн идэвх, оролцооны өнөөгийн байдал, салбарын үйл ажиллагаа, тогтвортой байдлын хэрэгжилтэд эмэгтэйчүүдийг түлхүү оролцуулах, ойн салбарын эмэгтэйчүүдийн орлогыг нэмэгдүүлэх боломжийг эрэлхийлэх, гадаадын туршлага, ололт амжилтаас хуваалцах, хоорондоо мэдээлэл солилцож хамтран ажиллах түншлэлийг нэмэх зорилгоор “Ой, тогтвортой байдал, эмэгтэйчүүд” холбоо, Ойн газар, Монголын ой модны мэргэжлийн холбоодын нэгдэл хамтран зохион байгуулав.   

Ойн газрын Ойн нөхөн сэргээлтийн хэлтсийн дарга Б.Ганзориг сургалтад оролцогчдод дараах мэдээллийг өгөв.

 
-Тэрбум мод хөтөлбөрийг хэрэгжүүлж эхэлснээс хойш манай улсад 50 сая мод тарьсны  дийлэнхийг Сэлэнгэ, Төв аймагт тарьсан. Хоёр жилийн өмнө мод үржүүлгийн 306 газар байсан бол одоо 420 боллоо. Мөн тарьцын нөөц өссөн. Ойн салбарт 880 тусгай зөвшөөрөлтэй ААН бий. Манай салбарт 3400 хүн ажиллаж байгаагийн 52 хувь нь эрэгтэйчүүд.
 
Дараа нь “Ой, тогтвортой байдал, эмэгтэйчүүд” холбооны захирал, доктор М.Хишигжаргал илтгэл  тавилаа. Тэрээр “Бид галан дунд буюу манай дэлхий хамгийн их гандалт, цөлжилттэй үед амьдарч байна. Иймд ойн салбарын эмэгтэйчүүдийн хамтын ажиллагаа их чухал. Салбарын ажиллагсдын хүйсийн харьцаа одоо ойролцоо байгаа ч оюутнуудын дийлэнх нь охид байна. Салбарын 200 орчим эмэгтэйгээс судалгаа авахад цалин, нийгмийн хангамж хамгийн том тулгамдсан асуудал гэж хариулсан. Судалгаанд оролцсон эмэгтэйчүүдийн 40 хувь нь сарын нэг сая хүртэл буюу маш бага цалинтай ажилладаг. Мөн манай салбарт ойрын хугацаанд 8000-12 мянган хүний ажлын байр шинээр бий болно” гэсэн юм.

“Ой, тогтвортой байдал, эмэгтэйчүүд” холбоо нь 2023 онд байгуулагдсан. Словенийн ЭСЯ, Словенийн хамтын ажиллагааны нийгэмлэг, Словенийн ойн газар болон тус улсын ойн хүрээлэнтэй сүүлийн хоёр жилд хамтран ажиллажээ. Иймд өнөөдөр болсон сургалтад Словенийн Ерөнхийлөгч Наташа Пирк Мусар оролцон, мэндчилгээ дэвшүүлэв.  

Европын холбооны гишүүн Словени улсын газар нутгийн 55 хувь нь ойгоор бүрхэгдсэн, энэ чиглэлийн туршлагатай улс тул манай ойчид хамтран ажиллаж, туршлагаа хуваалцаж байна. Ойн газрын дарга Б.Оюунсанаа “Словени ойн менежмент сайтай улсуудын нэгт тооцогддог. Орчныг ногооруулах маш сайн туршлагатай. Иргэд нь ойн талаар мэдлэгтэй, ойн салбарынхантайгаа хамтран ажилладаг. Ой нөхөн сэргээгддэг баялаг тул бид тодорхой хэмжээнд ашиглах, ойг өргөжүүлэхийн тулд тогтоосон хэмжээгээр огтлох ёстойг иргэдэд ойлгуулах нь зөв” гэв.

Монголын ойн салбарын шинэчлэл сэдэвт сургалт маргааш үргэлжилнэ. 

Гэрэл зургуудыг Б.Даваа