УИХ дахь АН-ын бүлэг мэдээлэл хийж байна.

УИХ-ын гишүүн Ж.Баярмаа Ерөнхий сайд Л.Оюун-Эрдэнэ өөрөөс нь уучлал гуйсныг дурдаад өөрийнх нь талаар түгсэн мэдээллүүдийн талаар ТЕГ болон цагдаагийн байгууллагад хандана гэдгээ илэрхийллээ.

Тэрбээр "Бүлгийн даргын хамт Ерөнхий сайдтай уулзсан. Хүмүүс танд буруу мэдээлэл өгдгийг үгүйсгэхгүй гээд өөрийн улс төрийн замналын танилцуулгаа өгсөн. Би хэний ч үгийг дамжуулдаггүй, гар хөл нь биш гэдгээ илэрхийлсэн. Ерөнхий сайд надаас албан ёсоор уучлалт гуйсан. Сайндаж муудахыг алийг тэр гэх вэ. Гэхдээ гүтгэлэг бол хэмжээ хязгаартай. Төсөв дээр ч дуугараад бас гүтгүүлж байв. Өмнө нь нэг ч удаа цагдаа шүүх болж байсангүй. Гүтгэлгийн тэвчдэг байсан ч сүүлдээ охины минь нэр, зургийг ашиглаж гүтгэж байхад дуугүй байх боломжгүй. Хүүхдийг чинь оролцуулаад ирэхээр дуугарахыг чинь харъя гэж байгаа мэт... Хэрэв энэ удаад дуугүй өнгөрвөл цаашид ч гишүүд үг дуугарахаас эмээдэг болох вий. Тиймээс тагнуулын ерөнхий газарт хандана.  

УИХ-ын талбарт бид үгээ хэлэхгүй юм бол өөр хэн хэлэх юм бэ. Гудамжинд байгаа иргэд танхимд орж ирээд хэлэх боломжгүй шүү дээ. Дутагдлын хажуугаар дуугүй өнгөрдөггүй, болохгүй байгаа зүйлийг хэлнэ. Ерөнхий сайдын уучлалыг хүлээн авсан ч цаашдаа би хэлэх зүйлээ хэлнэ гэдгээ ч илэрхийлсэн.

Бид хоёрт ямар ч хувийн өс хонзон байхгүй. Би өмнө нь таньдаг ч үгүй байсан. Хамтарсан Засгийн газар байгуулагдахад нь дэмжсэн. Гэхдээ би хэлэх зүйлээ хэлнэ гэдгээ илэрхийлсэн. Сайтуудаар мэдээлэл бэлтгэн түгээж байна лээ. Эзэн нь хэн бэ гэдэг нь тодорхой ил байна. С.Баярцогт гишүүн асантай нэг нутгийнх ч болгож байна. Хэлмэгдсэн ахтай минь ч холбож байна. Тэр бүх мэдээлэл худал, гүтгэлэг. Бүгдийг нь тодруулахаар Цагдаагийн байгууллагад өгнө" гэв.