“The Hu” хамтлаг Үндэсний их баяр наадмаар тоглох тоглолтын талаар мэдээлэв. Тодруулбал тус хамтлаг Монголд анх удаа бие даасан, задгай талбайн тоглолтыг наадмын өмнөх өдөр буюу долоодугаар сарын 10-ны өдөр хийхээр болсон.

2016 оноос хойш үйл ажиллагаа явуулж буй “The Hu” нь "Хүннү рок" урсгалыг үндэслэгч, Монгол үндэстний хөгжмийг рок дуугаралттай хослуулан дэлхий дахинаа өөрийн өнгө төрхийг тодорхойлж буй "Чингис хаан" одонт хамтлаг юм.

Энэ хугацаанд дэлхийн алдартай хөгжмийн наадмуудаас эхлэн нийт 350 гаруй тоглолтод оролцжээ.

Ирэх сарын 10-нд болох тоглолт нь зөвхөн Монголд л үзэж харах боломжтой соёлыг шингээхийг зорьж буйгаараа онцлог хэмээн найруулагч, продюсерын багийнхан хэлж байлаа. Мөн ойрын таван жилийн хугацаанд Монгол дахин ийм бүрэн хэмжээний тоглолт хийхгүй гэдгийг дурдсан.

Энэ үеэр гаднын хөгжмийн наадам, тоглолтуудад тоглодог бүх уран бүтээлээ толилуулах аж. Тоглолт долоодугаар сарын 10-ны өдөр Үндэсний соёл амралтын хүрээлэнгийн хойно HIT Park Ulaanbaatar-т болно.