ДЦС-3 ТӨХК-д гарсан үйлдвэрлэлийн осол болон хүний амь эрсэдсэн асуудлаар Монголын эрчим хүч, геологи, уул уурхайн үйлдвэрчний эвлэлийн холбооноос мэдээлэл өгнө. 

Дулааны III цахилгаан станцад осол гарч, ослын улмаас нэг инженер амиа алджээ. Хууль хяналтын байгууллагаас эрүүгийн хэрэг нээж, хэргийн газарт үзлэг шалгалт хийж байна гэсэн мэдээллийг Эрчим хүчний сайд Б.Чойжилсүрэн өгч, ёс зүйн хувьд хариуцлага хүлээхэд бэлэн гэж мэдэгдсэн. 

ЭРЧИМ ХҮЧНИЙ САЛБАР ЗАСАГЛАЛЫН ХЯМРАЛД ОРСОН

Монголын эрчим хүч, геологи, уул уурхайн үйлдвэрчний эвлэлийн холбооны Эрчим хүчний салбар хариуцсан нарийн бичгийн дарга Д.Эрдэнэбат, Эрчим хүчний салбар засаглалын хямралд орсон. Төр засгаас энэ салбарын тулгамдсан асуудлыг шийдвэрлэхээр ажиллаж байгаа гэх боловч энэ нь өөрөө засаглалд хямралд оруулсан.

Эрчим хүчний яам гэж бодлогын яам байдаг ч энэ яам бодлогоо барьж чадахаа больсон. Эдийн засгийн хөгжлийн яаманд бүх томоохон төслөө өгчихсөн. ЗГХЭГ-ын дэргэд Эрчим хүчний хурдасгуур төв гэж байгуулаад, тэнд бас бодлогын асуудлаа өгсөн. Эрчим хүчний реформ хийж байна гэж Эрчим хүчний үндэсний хороо байгуулж, тийш нь бас бодлогын асуудлуудаа өгсөн. Эрчим хүчний салбарын хуулийн төслийг Эрчим хүчний яам хариуцах ёстой байтал өөр нэг УИХ-ын гишүүнд даатгаад орхисон. Салбарын яам бодлогын бүх асуудлаас хойш суусан. 

ДЦС-д ийм ноцтой осол гараад байхад тэр хариуцсан гэх яам, реформын хороо, сайд нь таг дуугүй байна. Салбарын сайд, Эрчист Монгол компанийн захирал хоёр нь “би хариуцахгүй” бие бие рүүгээ шидэж байна.

Ийм хямрал эрчим хүчний салбарт нүүрлэлээ. Энэ хямрал ажиллах хүчний хямрал болсон. Нам дагасан, нутаг усны гэх мэт мэргэжлийн бус томилгоонуудыг хийдэг болсон. Өнөөдөр тэр хүмүүс юу ч хийгээгүй, ажлаа хийж байгаа ажилчдыг дарамталсан. Бүтээмж чанарыг сайжруулж чадаагүй. 

Эрчим хүчний салбарын сайд ажиллах хүчнийхээ төлөө нэг ч шийдвэр гаргасангүй. Сайдаар томилогдсон хугацаандаа ажиллах хүчнийхээ төлөөлөлтэй ч уулзсангүй.

Дэлхий нийтээр эрчим  хүчний асудал хүнд байгаа. Гэхдээ нэг номерт ажиллах хүчнээ бодож шилжилт хийж байгаа. Дарга нар солигддог байсан инженер техникийн ажилтнууд, бүр үйлчилгээний ажилтнуудыг сольдог болсон. Захиргаа удирдлагын хэлтсийн дарга, Санхүүгийн дарга нарыг сольж байна. Энэ хүмүүс эрчим хүчний мэргэжлийн бус боловч байгууллагын хэвийн үйл ажиллагааг хангаж, хүний нөөцийн бодлогыг хэрэгжүүлдэг албан тушаалтнууд.

Эрчим хүчний салбарын сайд ажиллах хүчнийхээ төлөө нэг ч шийдвэр гаргасангүй. Сайдаар томилогдсон хугацаандаа ажиллах хүчнийхээ төлөөлөлтэй ч уулзсангүй. Үе үеийн сайд нар ийм байсан. Энэ бүхний шалтгааны нь ийм ноцтой осол болж гарч ирж байна. Хөдөлмөрийн аюулгүй байдал алдагдаж, хүний амь хохирч байна. Энэ осол аваарын хариуцлагыг сайд дарга нар хүлээх ёстой.

Эрчим хүчний салбар Монгол Улсын ҮАБ-г хамгаалах үүрэгтэй тэргүүлэх салбар боловч техник, технологи нь хоцрогдож хуучирснаас гадна, техникийн шинэчлэл хийх төсвийг дорвитой шийдэж чадсангүй. Эрчим хүчний салбар засаглалын хямралд орсон. Энэ салбарын бодлогыг хэн хэрэгжүүлж байгаа нь тодорхойгүй. Эрчим хүчний реформ, хууль эрх зүйн шинэчлэл, төрийн өмчим компаниуднын бүтэц, зохион байгуулалтын өөрчлөлт хийхдээ нэгдсэн бодлого уялдаа холбоогүй явж ирлээ.  

Мэргэжлийг бус томилгоог энэ салбарт сайдаас эхлээд инженер, техникийн ажилтнуудын түвшинд хийж ирсэн нь туршлагатай, ур чадвартай, мэргэжлийн ажилтнууд гадуурхагдах, ажиллах итгэл урам зориггүй болох, ажлаас гарахад нөлөөлөх болсон. 

ХАБ зөвхөн цаасан дээр л байна. Эрчим хүчний алдагдлыг ажилчин хүн амиа насаараа үүрч байна. Хүний амь үнэ цэнтэй. Аваарийг зогсоохын төлөө ажилчин амь насаа зориулж байна. Эрүүл амьд явах баталгаа алга. Хөдөлмөрийн хүнд, хортой, халуун нөхцөлд өндөр аюул эрсдэлийн дунд ажилладаг. 

Монголын эрчим хүч, геологи, уул уурхайн үйлдвэрчний эвлэлийн холбооноос мэдээлэл хийж байна.

ТЭЦ-3 ДЦС-д 6-р сарын 1-нээс 2-нд шилжих шөнө осол гарч, нэг инженер амиа алдсан. Эрчим хүчний салбарт сүүлийн таван жилд гарсан үйлдвэрлэлийн ослын улмаас 2020 онд 3, 2021 онд 1, 2023 онд 3, 2024 онд 1, 2025 онд сая нэг хүн нас барсан гэж тус холбооны Ерөнхий нарийн бичгийн дарга А.Дагвадорж танилцуулав.

Тэрбээр, Манай холбооноос 2023 оны 9-р сарын 26-ны өдөр эрчим хүчний садбарын ажилтнуудын анхдугаар зөвлөгөөн хийж, энэ салбар элгээрээ хэвтэх гэж байна. Цалин хөлс, нийгмийн хамгааллын асуудал, ажиллах орчин нөхцөл аюултай буюу эрсдэл өндөртэй зэргээс болж ажиллах хүн олдохгүй болж байна. Үүнд анхаарал хандуулаач гэсэн асуудлыг Засгийн газарт тавьсан.

Эрчим хүчний салбарын ажилтнууд хагас цэрэгжилтийн байдалд ажилладаг. Ямар нэг осол гарвалзаавал зогсоох үүрэг хүлээдэг. Эрчим хүчний салбарын байгууллагуудын 40, 50, 60 жилийн насжилттай, хуучирсан тул тэнд ажиллаж байгаа мэргэжилтнүүдийн хүчээр ажиллаж байна. Маш хүнд нөхцөлд ажиллаж байгааг мэдэгдсээр байтад анхааралдаа аваагүй. Цаашид ийм осол гарах нь цаг хугацааны л асуудал.

Эрчим хүчний салбарынхан ийм хүнд нөхцөлд ажиллаж байна. Засгийн газар эрчим хүчний салбарын ажилтнуудынхаа дуу хоолойг сонсож, үе шаттай арга хэмжээ авах ёстой байсан.

2024 оны 10 сард эрчим хүчний үнэ тариф нэмэх асуудлыг салбарын ажилтнуудынхаа цалин хөлсийг нэмэгдүүлэх зорилгоор дэмжсэн. Үнэ тарифын нэмэгдлээр 500 гаруй тэрбум төгрөгийн эх үүсвэр бий болсон. Түүгээр юу хийсэн нь ойлгомжгүй. Манай холбоо тоног төхөөрөмжийн шинэчлэл, болон ажилтнуудын цалин хангамжийг нэмэгдүүлэхийн тулд үнэ тарифыг нэмэхийг дэмжсэн ч үр дүнд хүрээгүй гэв.
 

"АВААРЫГ УСТГАХААР ЭЦСЭЭ ХҮРТЭЛ АЖИЛЛААД, ШИЛДЭГ ИНЖЕНЕР МААНЬ АМИА АЛДЛАА"

ТЭЦ-3 ДЦС-ын Үйлдвэрчний эвлэлийн дарга Энхсаран, Манай байгууллага 20 гаруй жил ажилласан нэг шилдэг инженерээ, хамт олон маань найзыгаа, дүүгээ, ахыгаа алдсан харамсалтай хэрэг гарсан. Манай станц 198 МВаттын хүчин чадалтай, 13 зуух, 9 турбинтэй.

Төвлөрсөн эрчим хүчний системийн 13 хувь, Улаанбаатар хотын дулаан хангамжийн 32 хувийг хангадаг. 2025-2026 оны өвлийн ачааллыг давах бэлтгэл ажлын хүрээнд станц 6-р сарын 1-ний шөнөөс бүрэн зогсолт хийх, 2-ны өглөөнөөс засварын ажил эхлэх төлөвлөгөөтэй байсан.

Төлөвлөгөөний дагуу 6-р сарын 1-ний шөнө тоноглол зогсоох явцад аваар гарч гал гарсны нэг ажилтан маань амиа алдлаа. Ажилтнууд маань сэтгэл зүйн хувьд хүнд байдалд байна. Гэхдээ үүрэг хариуцлагаа хүлээгээд засварын ажлаа эхлээд байна. Үйлдвэрлэлийн ослын шалтгааныг мэргэжлийн байгуууллагууд шалгаж, дүгнэлтээ гаргана.

Ажилтнууд маань сэтгэл зүйн хувьд хүнд байдалд байна.

Өнөөдрийг хүртэл Засгийн газар, Эрчим хүчний яам, ЭХЗХ энэ байгууллагуудын алдаатай шийдвэрийг ажилтан нь нуруундаа үүрч ирсэн. Салбарынхан асуудлаа тавихад хөрөнгө санхүүжилт дээр тулаад гацдаг. Эрчим хүчний салбарынхан эрүүл орчинд ажиллах, амьд үлдэх баталгаа алга байна. Дээр нь цалин багатай учир ажилтнууд тогтохгүй байна. Хүний нөөцийн маш их дутагдалд орсон. Ажилтнууд маань шантарч байна.

Эрчим хүчний салбар чадлын дутагдалд орсон учир тоноглолоо шаардлагатай үед нь зогсоогоод засвар үйлчилгээ хийж чадахгүй байна. Техник ашиглалт, аюулгүй ажиллагааны дүрмийг мөрд гэж байгаа ч дүрэм зөрчиж ажиллах шийдвэрийг дээрээс л гаргадаг. 

Энд өндөр хүчдэл, өндөр даралттай уур, ус, эргэх механизм байна. Эрчим хүчний салбарын ажилтнууд маш өндөр эрсдэл, аюул дунд ажиллаж байна.