Манай улсад түрээсийн скүүтер, дугуйн үйлчилгээ нэвтрээд жил гаруй боллоо. Автомашин, автобусаар зорчиж, олон цаг замын бөглөрөлд гацахгүй гэх эдгээр унааг бид дулааны улиралд хэрэглэх журамтай. Тиймээс ч урь орсон цагаас л өдөр тутамдаа скүүтер, дугуйг хэрэглэж байна.

Хэрэглээ нэмэгдэж байгаагийн хэрээр, мөн замын хөдөлгөөний дүрэм мэдэхгүй хүн тус тээврийн хэрэгслийг ашиглах болсноор осолдож, бэртсэн, дайруулсан хүмүүс ГССҮТ-рүү цувж байна. Иймд манай редакцаас Цахилгаан скүүтерээр замын хөдөлгөөнд оролцох ДҮРЭМ бий гэх нийтлэлийг хүргэж байсан.

Энэ удаад түрээсийн скүүтер, дугуйг хэрэглэснийхээ дараа хэрхэн олон нийтэд хүндрэл учруулахааргүй газарт байрлуулах хэрэгтэйг онцолж байна. Тодруулбал, түрээсийн скүүтер хэрэглэгчид хайнга үйлдэл гаргаж, ашигласан скүүтер, дугуйгаа хаа хамаагүй хаяад явж байгаатай бид өдөр бүр таарч байна. Явган хүний замыг хөндөлсүүлэх, орц гарц хаах, хөгжлийн бэрхшээлтэй хүний зам дээр орхисон скүүтер бусдад төвөг учруулж буйг дараах зургуудаар баримтжуулж, дахин ийм үйлдэл гаргахгүй байхыг уриалж байна.

ХӨГЖЛИЙН БЭРХШЭЭЛТЭЙ ХҮМҮҮСТ СААД БАГАДААГҮЙ

Явган хүний зам дээрх шар, товгор тэмдэглэгээтэй хэсэг бол харааны бэрхшээлтэй иргэдийг замчлах үүрэгтэй. Үүнийг хүн бүр мэднэ.

Тиймээс та скүүтерээ ашиглаж дуусгаад тэдний зорчих замаас зайдуу байрлуулаарай. Үгүй бол таны хайхрамжгүй үйлдлээс хэн нэгэн унаж, бэртэн эрүүл мэндээрээ хохирч болзошгүй.

ОРЦ ГАРЦ БҮҮ ХААГААРАЙ

Түрээсийн скүүтер таны хувийн хэрэгсэл биш гэдгийг санаж гэрийнхээ гадна авч ирэхээ болино уу. Хэрэглэсэн скүүтер, дугуйг хаана байрлуулах ёстойг зааж өгсөн байдаг учраас гар утасны аппликейшн дээрээс хайгаад олох боломжтой.

Орцны үүдэнд орхисон скүүтерт гадаа тоглож байгаа хүүхэд багачууд тээглэх, даруулах зэрэг эрсдэл учирч болзошгүй. Мөн хашааны ам, гарц дээр байрлуулсан скүүтерийн хажуугаар зөрөхөд хүндрэлтэй тун хүндрэлтэй. Тиймээс бусдыгаа хүндэтгээрэй.

ЗАМ ХӨНДӨЛСӨХӨӨ БОЛИНО УУ

Явган зорчигч таны зам хөндөлсүүлэн орхисон скүүтертэй таараад эхний удаа ямар ч асуудалгүйгээр тойроод л гарах байх. Ингэж яваад дахид нэгтэй таарвал "Өө дахиад л" гээд тойрно. Харин гурав, дөрөв, тав, зургаа дахь удаа таарвал яагаад скүүтерээ хүний хөлөөс холдуулж болдоггүй юм бол гэж бухимдах вий.

Учир нь хүүхдээ түрж яваа аав, ээж, тэргэнцэртэй хүн, суга таягтай өвчтөн, хөл нь өвдөж таяг тулсан эмээ, өвөө, алхаж сурч байгаа багачууд гээд хэн ч явж байна болно. Эсвэл ажил, хичээлдээ хоцрох гээд сандран гүйх аавын хүү, ээжийн охин ч явж байж мэднэ. Таны зохисгүй үйлдлээс тэр бүх хүний амгалан байдал алдагдана.

Үнэхээр та яараад хэрэглэсэн скүүтерээ явган хүний замаас гаргаж амжихгүй бол замын захыг дагуулан байрлуулж, бусдыг чөлөөтэй зорчиход бүү саад болоорой.

СКҮҮТЕР АВТОМАШИН БИШ ШҮҮ ДЭЭ

Автомашины хаалганд нь наалдуулаад скүүтерээ байрлуулдаг хүмүүс бий. Эсвэл автомашин байрлах зогсоолын тэг голд нь байрлуулаад орхичихдог нь бий. Яг энэ зураг дээрх шиг.

Тоормостой учраас скүүтерийг хөдөлгөх боломжгүй. Мөн машины хаалга онгойлгоход хэцүү. Машины будаг халцарч, сэв зураас үүсгэж ч болно. Ажилдаа явахаар машиндаа суух гэтэл ийм дүр зураг угтвал хэнд ч төвөгтэй санагдана шүү дээ. Тиймээс л бусдад төвөг учруулахгүйн тулд хэрэглэж дуусаад скүүтер, дугуйгаа зориулалтын цэгт байрлуулах нь зүйтэй.

Таны бусдыг бодоогүй, хариуцлагагүй үйлдлээс болж хэн нэгний эрүүл мэнд, үнэт цаг, эд хөрөнгө хохирч байдаг гэдгийг ямагт санаж замын хөдөлгөөнд соёлтой оролцоорой. Скүүтер унах нь танд давуу тал, бусдад бэрхшээл болох ёсгүй!