Өнөөдөр Засгийн газрын ээлжит хуралдаан болсон. Хуралдаанаас Аж үйлдвэр, эрдэс баялгийн сайд Ц.Туваан, Зам тээврийн хөгжлийн сайд Ж.Дэлгэрсайхан нарт БНХАУ-тай гэрээ байгуулах зөвшөөрлийг олгожээ.

Гэрээний бүтэн нэр - Монгол Улсын Засгийн газар, Бүгд Найрамдах Хятад Ард улсын Засгийн газар хооронд Гашуунсухайт-Ганцмод боомтын хил дамнасан төмөр замын бүтээн байгуулалтыг хэрэгжүүлэх хэлэлцээр

Ганцмод-Гашуунсухайтын төмөр замыг холбох ажилд нийт 976 тэрбум төгрөгийн хөрөнгө оруулалт шаардлагатай. Энэ мөнгийг “ЭТТ” ХК гаргана, урд хөршид нүүрс нийлүүлэх арга замаар энэ бүтээн байгуулалтыг хийхгүй гэдгийг Ц.Туваан сайд онцлов.

Тэрээр “Бид урь орж, ус гэсэнгүүт бүтээн байгуулалтыг хийхээр яарж байна. Хил холбоно гэж бид буруу нэрлэсэн. Хоёр улсын өргөн, нарийн цариг бүхий төмөр замууд холбогдохгүй. Харин харилцан хил давж орж ирнэ. Өөрөөр хэлбэл урдаас нарийн царигтай төмөр зам манай хилийг даван орж ирээд, манай зам урд хилийг нэвтлэн цааш гарна. Аль аль замын төгсгөлд нь ачиж буулгах байгууламж барина. БНХАУ-ын талд барих ачиж буулгах байгууламжийг тэд өөрийн зардлаар, манай улсад байгуулахыг бид өөрсдийн зардлаар барина” гэв.

Мөн Гашуунсухайт боомтод 1.4 км урт, хос төмөр зам бүхий гүүр барина. Гүүрний өндөр 28 метр, гүүрний газар доорх суурь 50-60 метр байх юм. Эдгээр ажил 2028 онд дуусах юм.

Засгийн газрын 2024-2028 онд хийх үйл ажиллагааны хөтөлбөрийн нэгдүгээрт Гашуунсухайт-Ганцмод боомтуудыг төмөр замаар холбох ажил бичигдсэн. Энэ нь экспортоо өсгөж, эдийн засгаа тэлэхэд эдгээр нь чухал ач холбогдолтой төсөл юм.

Хоёр улсын Засгийн газар хооронд хэлэлцээ хийх явцад баримтлах үндсэн чиглэлийг УИХ баталсан. Энэ хүрээнд гэрээний төслийг БНХАУ-ын талтай тохирчээ. Гэрээний хугацаа 16-19 жил байна.