Вьетнамын Дун Най муж дахь нэгэн нуурын эрэгт 200 тонн орчим загас үхжээ. Энэ нь сүүлийн өдрүүдэд тус улсад тохиож буй хэт халалттай холбоотой болохыг фермерүүд тайлбарлаж байна.

Тодруулбал өнгөрсөн сард Вьетнамын өмнөд хэсэгт цельсийн 40 хэмд хүрч халсан бөгөөд бороо ороогүй удсаны улмаас нуурын усны түвшин багасаж, загаснууд амьдрах боломжгүй болсон аж.
Загаснууд олноороо үхсэн тул ойр орчмын үнэр тэсэхийн аргагүй байгаа бөгөөд үхсэн загаснуудыг уснаас гаргаж, цэвэрлэх ажил ч хүнд байгааг фермерүүд ярьжээ.
Сүүлийн үед Зүүн өмнөд Азийн улсуудад хэт халалт тохиож, зарим улс сургуулиудынхаа үйл ажиллагааг түр зогсооход хүрээд буй. Тухайлбал Филиппинд энэ долоо хоногийн эхээр 47 мянга гаруй сургуулийн үйл ажиллагааг цахим хэлбэрт шилжүүлсэн.

Түүнчлэн энэ жил Камбож улсад сүүлийн 170 гаруй жил дэх хамгийн халуун өдрүүд тохиосон бөгөөд тус улсын цаг уурын байгууллагаас энэ долоо хоногт ихэнх нутгаар цельсийн 43 хэмд хүрч халж болзошгүйг анхааруулаад байна.

Эх сурвалж: CNN