Өнөөдөр Бурхны шашны хийдүүдийн төлөөлөгчид нэгдсэн байр сууриа илэрхийллээ. Нийт хорь гаруй хийд хамтран бурхны шашны нэгдмэл бодлого, зорилтыг тодорхойлж, цаашид хамтран ажиллах төлөвтэй байгаа ажээ.

“Өнөөдрийг хүртэл үйл ажиллагааныхаа бодлого чиглэлийг тодорхойлоогүй, шинэчлэгдэж өөрчлөгдөөгүй цорын ганц салбар бол бурхны шашны төлөөлөгчид” хэмээн өөрсдийгөө дүгнэжээ.

Мөн гадны шашнууд газар авч, эмх замбараагүй, хууль зөрчсөн үйлдлүүд хийж байгаа талаар тэд тун шүүмжлэлтэй хандаж байсан юм. Дэлхийн олон оронд үйл ажиллагааг нь хориглосон хэрцгий шашин манай улсад олноор нэвтэрч, эмэгтэйчүүдийг шашны урсгалынхантайгаа гэр бүл болгодог томоохон сүлжээ бий болсон талаар Мамба дацан хийдийн хамба лам Д.Нацагдорж ярьж байлаа.

Мөн тэдний зүгээс Гандантэгчилэн хийдийн хамба лам н.Нанзаддорж тэргүүтэй зарим удирдлагуудаас “хувийн хийдүүд олноор гарч, шашныг гажуудуулж байна” хэмээн мэдэгдэл хийснийг шүүмжиллээ. Энэхүү мэдэгдэлийг лам хүний сахил санваараа алдсан, ёс зүйгүй хэрэг хэмээн нэрлэсэн юм.

Мөн шашны сургуулиудад боловсролгүй бага насны хүүхэд авахыг зогсоож, бүрэн дунд боловсролтой, нийгэмтэй харьцах чадвартай хүүхдүүдийг оруулах нь зүйтэй гэж үзэж байгаа аж.

Лам нарын нэр хүнд буурч, “халтуур” хийх лам нарын тоо олширсон нь тэдний хөдөлмөрийн хөлсний доод хэмжээнээс ч доогуур цалин авдагтай холбоотой гэнэ. Энэ нь сахил санваараа зөрчих боломжийг бүрдүүлэгч гол хүчин зүйл ажээ.

Нийгэмд сэтгэл түгшээсэн, харгис гэмт хэргүүд гарах болсон нь хүнлэг энэрэнгүй бодлогыг баримталдаг бурхны шашны үйл ажиллагаа сулхан байгаатай холбоотой гэж үзээд бага наснаас нь хүүхдүүдэд бурхны шашны сургаалийг зааж сургах нь зүйтэй юм гэсэн санааг дэвшүүлж байлаа.

О.Ариунбилэг /ariunbileg@gogo.mn/