Дархан-Уул аймгийн хэмжээнд сүүлийн тав хоногийн турш бороо үргэлжлэн орсноос хуучин Дарханд харьяалагдах нийтийн эзэмшлийн орон сууцнууд дээврээсээ ус алдаж, оршин суугчид зутарч буй тухай бид өмнө нь мэдээлсэн. Тэгвэл нийтийн эзэмшлийн орон сууцны дээврийн засварын ажлыг тун удахгүй эхлэх болжээ. Улсын төсвөөс дээврийн засвар хийхэд зориулж 99 сая төгрөг хуваарилсан юм байна. Дээврийн засвар хийх тендер зарлагдаж, гүйцэтгэгч компани нь шалгараад байсан гэнэ. Борооны улмаас засварын ажил эхэлж болохгүй хойшлогдсон байжээ. Тодруулбал, КОТЕ компани тус аймгийн дээврийн засварын ажлыг хийхээр шалгарсан аж. Нийтдээ 5130 ам метр талбай бүхий орон сууцны дээвэр засах гэнэ. Түүнчлэн өнгөрсөн жилүүдэд орон сууцны дээврийг алаг цоог засдаг байсан. Энэ жилээс нийтээр нь засварлуулахаар тендерт шалгарсан компанитай гэрээ байгуулсан юм байна.