Шинэ он гархад долоо хонов үлдээд байна. Өнгөрсөн долоо хоногоос урд хөршид юаны үнэ унасан гэх сургаар "Нарантуул", "Бөмбөгөр" захын ченжүүд зарж байгаа зүйлийнхээ үнийг нэмж эхэлсэн. Хамгийн гүйлгээтэй бараа болоод болох гацуур модны үнэ ямар байгаа талаар "Нарантуул" худалдааны захын ченж Г.Батдоржтой ярилцлаа.

-Энэ жил гацуур модны үнэ өссөн байна. Яагаад өссөн юм бэ?
-Тийм ээ. Жил бүрийн өдийд гацуур мод хамгийн их борлогддог. Шинэ жил дөхөөд ирэхээр гацуур мод зардаг ченжүүд олширдог. Гацуур модны үнэ өнгөрсөн жилийнхтэй харьцуулахад 5-30 мянган төгрөгөөр нэмэгдсэн. Хэрэв үнийг нь нэмж зарахгүй бол бидэнд ашиг гарахгүй.

-Гацуур моднууд хэдэн төгрөгийн хооронд зарагдаж байна вэ?
-Нэг метр гацуур мод 30 мянга, хоёроос гурван метр нь 130-180 мянган төгрөг байна. Хүмүүс их авч байгаа болохоор энэ жил ашигтай, гүйлгээ ихтэй байгаа.

-Чанарын шаардлага хангахгүй, амархан эвдэрдэг гэсэн гомдол иргэдээс байнга гардаг. Энэ талаар тодруулахгүй уу?
-Хятадууд аливаа юмыг гоё ганган хийдэг ч хэдхэн хоногийн настай, амархан эвдэрдэг, хэврэг байдаг. Үүнийг хүн бүхэн мэддэг шүү дээ. Гацуур модонд гэрэл, чимэглэл гээд олон зүйл нэмэгдсэн. Тиймээс хүмүүс хуучин гацуур модоо сольж шинийг авч байна.

-Урд хөршөөс хэдэн төгрөгөөр худалдаж авдаг юм бэ?
-Бидэнд нийлүүлдэг ченжүүд байдаг. Тэд үйлдвэрийн үнээр зардаг. 180 мянган төгрөгөөр зарж байгаа гацуур мод урд хөршид 130 мянган төгрөг байх жишээтэй. Тэгж байж дундаас нь ашиг олдог юм.

Э.Хүрэлбаатар