Хэн хүний анхаарлыг татаж алхаж гишгих нь хүртэл сонин байсаар ирсэн цуутай хос бол аварга  Д.Сумъяабазар, мисс Ч.Мичидмаа нар билээ. Бөхөө дээдэлдэг Монгол түмнийхээ хүсэлт "шахалт"-аар аварга цолонд хүрсэн Д.Сумъяабазар мисс гэргийгээсээ насаар дүү хэдий ч аавыг нь эргүүлдэн байж баахан гүйсний эцэст ураг барилдсаныг мэдэх хүмүүс нь ярьдаг. Тэрчлэн сайхан хүүхэнтэй заяа холбосон бөх хүн амжилт гаргадаггүй гэсэн ам дамжсан яриа ч тэднийг тойроогүй дайрч байв. Аварга, мисс хоёр хоёулаа нэр сүртэй айлын хүүхдүүд гэдгийг хэн хүнгүй  мэднэ.  Олон жил тээвэрт явсан улсын заан Долгорсүрэнгийн дөрвөн хүүгийн нэг аварга маань өөрсдийнх нь хүмүүжил төлөвшилд ааваас нь илүүтэй ээж О.Пүрэвбадамынх нь нөлөө их байсныг ярьдаг.

Угаас чанд хатуу байхыг хүүхдүүддээ сургамжилж, жавтий хүртээхдээ ч хүртээж ирсэн О.Пүрэвбадам гуай түүнийхээ үр шимийг үзэж Д.Дагвадорж хүү нь мэргэжлийн сумогийн ертөнцийг доргиож яваа. Харин мисс Ч.Мичидмаа Монголын нэртэй сийлбэрч Чуваамид гуайн эрх охин. Монгол түмнийхээ соёлын өвд өөрийнхөө зүгээс ихээхэн зүйлийг бүтээж үлдээж байгаа нэрт сийлбэрчийн бүтээлүүд төрийн ордонд ч буй, эгэл олны дунд ч бий. Архангай нутгаас гаралтай Чуваамид гуай хайртай бага охиноо нэртэй бөхтэй дэр нэгтгэхэд анхнаасаа найртай хүлээж авч байсан гэдэг. Долгорсүрэн заан, О.Пүрэвбадам гуай хоёр ч хүүгээ Монголын сайхан бүсгүйг гэргийгээ болгохоор дагуулан ирэхэд нь хөл алдан угтаж байж. Гэхдээ Пүрэвбадам гуай өдийг хүртэлх тэдний амьдралд нэг их оролцож байсан удаа ч байхгүй гэдэг.

Ямартаа л манай бэрүүд хүүхэд төрүүлсэн л бол 5 нас хүртэл нь гэртээ харж өсгөдөг гэж байхав. Хадам ээжийнхээ хууль мэт энэ шаардлагыг дагадаг мисс арын албаа бат манаж ажил төрөл гэж явалгүй 2 хүүхдээ харж гэрээ сахьсаар өдийг хүрсэн. Д.Сумъяабазар аварга, мисс Ч.Мичидмаа хоёрын хамтдаа явааг харсан хүмүүс дэндүү сайхан хосууд гэж ам уралдан ярьцгаасаар ирсэн ч сайн саар зэрэгцдэг хойно тэдний тухай элдэв хов ч бишгүй л дуулддаг. Уг нь эр эмийн хооронд илжиг бүү жороол гэдэг дээ. Мисс Ч.Мичидмаа түргэн ааштай, танхи дураараа нэгэн гэж бүр ойр дотных нь хүмүүс ил далд ярьдаг. Бөхийн түүхэн дэх цөөхөн аваргуудыг одоогоор отголоод байгаа авааль нөхөрт нь сэтгэл алдарч, эргүүлдсэн бүсгүйчүүд ч цөөнгүй байдаг тул үе үехэн айхтар хардаж асуудал үүсгэдэг гэх. Мань аварга ч ялгаагүй сайхан гэргийгээ хардаж туфлийнх нь өсгийг хугалаад хаячихсан тохиолдол нэг биш. Чуваамид гуай нэгэнтээ "Манай хүргэн архи уухаараа л жаахан тийм" гэж ярилцлагадаа үг унагасан удаатай. Амжилт амьдрал нь тэгширсэн аварга ч карьер хөөж НИТХ-ын гишүүн хүртэл болчихсон цохиж яваа. Зүлэг ногоон дэвжээнээ эр бяраа гайхуулдаг аваргатай холбоотой цочир сонинг олон нийт нүд, чихнийхээ хажуугаар өнгөрөөхгүйг яалтай.

Хэдхэн хоногийн өмнө төрийн ордны баруун талын зам дээр машинтайгаа явж байсан аварга, мисс
хоёр гэнэтхэн зогсож Мичидмаа машинаасаа буугаад яаран алхтал юу юугүй Д.Сумъяабазар аварга араас нь үсэрч гарч ирээд мисс гэргийнхээ нүүр рүү нударга буулгаж аваад машиндаа суулгаад давхиад явав. Гэгээн цагаан өдөр хотын төвд эмзэг турьхан эхнэртээ олны өмнө эр бяраа гаргасан аварга эргэн тойрноо ч мартсан бололтой. Хэсэгхэн хугацаанд яах ийхийн зуургүй болоод өнгөрсөн дээрх явдлыг харж үзсэн хүмүүс гайхшаа бараад өнгөрөв. Алдар нэр, өнгө мөнгө, албан тушаал хүнийг эвддэг гэдэг. Нэр хугарахаар яс хугарахын илүүг эрхэм аварга эрх биш мэдэх биз ээ.