Facebook шууд дамжуулах платформ болохын тулд хийж буй олон ажлын нэг нь хэрэглэгчид дуу бичлэгийг шууд сонсдог болох юм. Учир нь компани шууд дамжуулалтыг өөрсдийн ирээдүйн төлөв гэж төсөөлж байгаа бөгөөд их хэмжээний хөрөнгө оруулалт хийх болжээ.

Одоо удахгүй хэрэглэгчид Facebook хуудсаар дамжуулан аудио хэлбэрийн бүхий л контентыг шууд хүлээн авдаг болох аж. Учир нь контент бүтээгчид заримдаа дүрс бичлэгээр бус үгээр өөрсдийн хүргэх гэсэн санааг бусдад түгээхийг хүсдэг төдийгүй, зарим тохиолдолд сүлжээ муутай орчноос шууд дамжуулах нь бий.

Тэгэхээр Live Audio үйлчилгээний ачаар контент бүтээгчид хэрэглэгчидтэйгээ шууд харилцах боломж бүрдэх юм. Андроид үйлдлийн системтэй хэрэглэгчид Facebook аппликейшнээ хаасан ч гэсэн, утсаа түгжсэн байсан ч Live Audio сонсож болох аж.

Ингэснээр Facebook уламжлалт хэвлэл мэдээллийн хэрэгслийн нэг болох Радиог замаасаа зайлуулах гэж байна. Эхний ээлжид BBC World Service, LBC тэргүүтэй хэд хэдэн хамтрагч байгууллагууд нь Live Audio-г ашиглах бөгөөд ирэх жилийн эхээр бусад хэрэглэгчдэд хүргэхээр төлөвлөжээ.