Дэлхийн эдийн засгийн хямралаас үүдэн манай орны банкууд иргэдэд зээл олгохоо зогсоогоод cap гаруй хугацаа өнгөрсөн. Арилжааны банкууд зээлээ зогсоосноос болж автомашин авах хүмүүсийн тоо цөөрч, үүнийг даган төмөр хүлгийн үнэ хямдарч байна гэх яриа гарах болсон. Манай орон ихэвчлэн Япон, Өмнөд Солонгос улсаас автомашин импортолдог. Тухайн орондоо явж байсан 1990-1998 оны машиныг ченжүүд оруулж ирдэг. Автомашины үнэ ханш ямар байгааг тодруулахаар "Да хүрээ"техникийн захыг зорилоо. Ченжүүдийн зарж байгаа машин эзнээ хүлээн бүтэн жил болох нь ч байдаг гэнэ. Машины үнэ ямар байгаа талаар тус захад газар машин зардаг А.Мөнгөнцоожтой ярилцлаа.

-Машины үнэ хямдарсан гэж сонслоо?
-Машины үнэ хямдраагүй хэвээр байгаа. Одоохондоо машин авах гэсэн хүмүүс цөөн байгаагаас зарим нэг ченж тийм цуурхал тараагаад байгаа юм. Уг нь жил бүрийн өдийд машины худалдаа сайн байдаг. Учир нь малчид өдий үед идэш бэлтгэн борлуулж, олсон мөнгөөрөө машин авдаг. Энэ жилийн хувьд арьс, шир, махны үнэ муу байгаа болохоор "Аксент", "Портер", "Бонго" маркийн машин зарагдахгүй байна. Шинэ жил, цагаан сарын үеэр машинтай болох гэсэн хүмүүс олширдог. Тэр үед л гайгүй байх.

-Хүйтний улиралд автомашиныг гадаа удаан байлгавал дугуй, мотор нь мууддаг гэсэн. Энэ талаар тодруулахгүй юу?
-Өвлийн цагт тос, маслыг нь солихгүй гадаа байлгавал автомашины мотор мууддаг. Энд зарагдаж байгаа захын ойролцоо амьдардаг айлуудад мөнгө төлж хашаанд нь хонуулдаг юм.

-Одоогоор машины ханш ямар байгаа вэ?
-"Аксент" 4-5, "Портер", "Бонго" 3,5-5,2 "chaser", "mark II" 7-8,7, "landCruser" 8-15 мянган ам.долларын ханштай байна.

Хүйтэнд машины моторын чанар мууддаг
Хүйтний улиралд авто машины эд анги элэгддэг аж. Энэ талаар хувиараа машин засдаг Б.Өлзийбатаас тодрууллаа.

-Зарагдаж байгаа машинууд хүйтэнд удаан байснаас болж моторын эдэлгээ мууддаг уу?
-Мэдээж эдэлгээ нь муудалгүй яахав. Манайд зарагддаг ихэнх машиныг дулаан орноос авчирсан байдаг. Өвөл, зуны тос, масло үнэтэй байгаа болохоор барагтай бол солидоггүй. Үүнээс болж моторын чанар мууддаг. Машин худалдаж авсан хүмүүс 3-5 cap болоод л мотор нь цохьчихсон гээд засуулах гэж ирдэг. Мөн удаан хөдөлгөхгүй зогсоогоод байвал дугуй нь мууддаг. Долоон сараас хойш ийм тохиолдлоор осолдсон 10 гаруй машиныг засуулсан. Сүүлийн үед олгой хаймаргүй шууд хийлдэг дугуйг машиндаа тавидаг болсон. Энэ нь осол гаргахад нөлөөлдөг. Хурдтай явж байгаад тормос гишгэхээр дугуй маш амархан хагардаг.

-Шинээр машин авах гэж байгаа жолооч нар юуг анхаарах ёстой вэ?
-Хэрэв авсан машин чинь өвлийн тосоолгүй бол шууд сольж дугуйг нь муудсан эсэхийг сайтар шалгаж үзээд сонгох хэрэгтэй.

Э.Хүрэлбаатар