"Өсөх импэкс" ХХК-ийн түрээсийн гэрээгээр ашигладаг агуулахын хөргөлтийн системийн 25 мм-ийн буцах шугам дээр хайрцагтай гахайн мах унаснаас, шугам хоолойд цав гарч ойролцоогоор нэг тонн химийн бодис алдагдсан гэж үзэж байсан, Алдагдсан аммиакийн хэмжээг өчигдөр 180 кг гэж тогтоожээ.

Уг агуулах 288 ам метр талбайтай. Системийг нь хааж, агуулахыг цоолон дөрвөн винтилятороор агаарт дэгдсэн аммиакийг сэнсээр үлээлгэж, усаар саармагжуулсан байна. Аммиак шингэсэн 20 шоо метр мөсийг зургаан тн-ын багтаамжтай хоёр торхонд хийж битүүмжлэн булахаар шийдвэрлэжээ.

Химийн бодисыг аюулгүй болгох, саармагжуулахад ажилласан хүмүүсийг  эмчийн үзлэгт оруулахад эмгэг өөрчлөлт, хордлогын шинж илрээгүй аж. Хордлогоос урьдчилан сэргийлэх зорилгоор содын уусмалаар нүд, хамар, хоолойг нь зайлуулан, суү уулгажээ. УМХГ-ын байцаагч нар уг агуулахад байсан 25 тн 675 кг махнаас дээж авч шинжлэн шаардлага хангахгүй гэж гарсан тул устгахаар болсон. Сонгино хайрхан дүүргийн Онцгой комисс устгалын хэсэг томилон, өчигдөр 10.00 цагт Налайх дүүргийн хогийн цэгийн орчимд таван хэсэг газарт нүх ухаж, аммиактай махыг шатаажээ.

Агуулахын зургаа, долдугаар камерт байгаа хүнсний бүтээгдэхүүнийг битүүмжилсэн агаад саармагжуулалт бүрэн дууссаны дараа шинжилгээ хийхээр болсон байна. Онцгой байдлын ерөнхий газар, Нийслэлийн онцгой байдлын газар, тус дүүргийн онцгой байдал, цагдаа, мэргэжлийн хяналт, тухайн аж ахуйн нэгжийн ажилтнуудаас бүрдсэн 100 гаруй хүний бүрэлдэхүүнтэй ажлын хэсэг химийн бодисын голомтод ажиллаж байгаа аж.

Х.Болор