Хөгжлийн бэрхшээлтэй залуучуудыг чадваржуулах, тэдний нийгмийн оролцоог нэмэгдүүлэх, бие даан амьдрах боломж нөхцөлийг бий болгох зорилгоор зохион байгуулж буй “Mini TRY - 2017” үйл ажиллагаа өнөөдөр болно.

Хөгжлийн бэрхшээлтэй 25, сайн дурын 30 нийт 55 залуу 09.00 цагаас Сандэй худалдааны төвөөс аяллаа эхэлнэ.

Тэд олон нийтийн үйлчилгээний байгууллагын хүртээмжийг үнэлэх, төрийн болон олон улсын байгууллагатай уулзалт зохион байгуулах, ХБХЭ тухай хуулийн хэрэгжилт, өнөөгийн нөхцөл байдлыг үзэж танилцах юм.

Түүнчлэн хөгжлийн бэрхшээлийн талаарх эерэг ойлголтыг нэмэгдүүлэх, дэд бүтцийн хүртээмжийг нэмэгдүүлэх зорилго бүхий “WHEELMAP” нөлөөллийн хөтөлбөр эхлүүлэх бөгөөд үүний үр дүнд хүртээмжтэй орчин бүхий байгууламжийн мэдээлэлд үндэслэн тэргэнцэртэй иргэдийн саадгүй зорчих хотын зураглал бүхий цахим хуудас ажиллах болно.

Ингээд үдээс хойш дүгнэлтийн хэлэлцүүлэг хийж аяллын явцад ямар саад, бэрхшээл буйг дүгнэн хэлэлцэх, түүнийг хэрхэн даван туулах боломжтой тухай, дараа дараагийн үйл ажиллагааны талаар зөвлөлдөн ярилцана.

Энэхүү үйл ажиллагаанд Өмнөговь аймаг, Ховд аймаг, Япон улсаас хөгжлийн бэрхшээлтэй залуус оролцож байгаа бөгөөд хөгжлийн бэрхшээлтэй залуучуудын асуудалд шийдвэр гаргах, оролцох, өөрсдийн зохион байгуулалтыг түлхүү гаргасан, тэдний нийгэмтэй танилцах, хоорондоо нөхөрлөх, туршлага солилцох үр дүнтэй үйл ажиллагаа болж буйгаар онцлог юм.