Монголын амьд хөгжмийн томоохон төлөөлөгчдийн нэг "Хурд" хамтлаг 13 нас хүрчээ. Нэгэн гэр бүлээс гаралтай ах дүүсийн хамтлаг сүүлийн үед чимээгүй байна хэмээн шүүмжилсэн фэнүүддээ ойн тоглолтоор бэлэг барихаар шийджээ. Төрсөн өдөртөө зориулан "Зүйрлэх аргагүй Хурд" тоглолтынхоо бэлтгэл ажилд аль хэдийнэ ханцуй шамлан орцгоожээ.

Олны чихэнд хоногшсон сайхан дуунуудыг төрүүлсэн "Хурд" хамтлаг байгуулагдсанаасаа хойш 400 гаруй дуу бүтээсэн аж. Харин "Зүйрлэх аргагүй Хурд" тоглолт нь тэдний арав дахь бие даасан тоглолт юм байна. Энэ удаагийн тоглолтоо тэд жинхэнэ галзуу, шинэ рок дуунуудаа дуулахаар сонгосон сурагтай. Зүйрлэх аргагүй рок дуугаар амьсгалах тоглолтын тов хараахан тогтоогүй бөгөөд ямар ч байсан "АСА" циркэд хийх нь тодорхой болжээ.