Сонгууль тойрсон хэрүүл маргаан, тэмцэл ард түмнийг залхааж байна гэхэд хилсдэхгүй болов уу. Хамгийн сүүлд, аравдугаар сарын 12-нд болсон орон нутгийн сонгууль араасаа хэл ам дагуулсан төдийгүй хүчингийн хэрэг үйлдэх шалтаг, шалтгаан болох нь тэр. Ийм нэгэн сонирхолтой гэхээсээ илүү жигшмээр хэрэг саяхан орон нутагт гарчээ. Булган аймгийн Хутаг-Өндөр сумын Хонгор толгой багийн Засаг дарга Ж.Батбаяр аравдугаар сарын 17-ны өдөр сог­туу­гаар наймдугаар ангийн охиныг хүчир­хийлсэн аж. Тэрбээр архи уусан үедээ хүүгийнхээ ангийн охиныг хүчирхийлж байгаад ээжид нь үйлдэл дээрээ баригд­сан байна. Энэ хэрэгт тус сумын Цагдаагийн хэсэг эрүүгийн хэрэг үүсгэн улмаар аймгийн Цагдаагийн газрын Мөрдөн байцаах албанд шилжүүлсэн аж. Засаг дарга Ж.Батбаяр цаг­даагийнханд өгсөн мэдүү­лэгтээ “Орон нутгийн сон­гуульд манай нам сумандаа ялалт байгуул­сан.

Түүнийг тэмдэглэж намын нөхөд­тэйгээ 2-3 хоног архи уусан. Олон хоног архи уусан тул хийж байгаа үйлдлээ хянах чадваргүй байсан. Нэг мэдэ­хэд л ийм хэрэг хийчихлээ” хэмээн жишим ч үгүй өчсөн тухай эх сур­валж мэдээллээ. Орон нутгийн сонгуулийн тухай хуулиар багийн Засаг дарга төрийн албан хаагч учир нэр дэвших эрхгүй. Харин Төрийн албаны зөвлөлийн шалгалтад тэнцсэн тохиол­долд төрийн алба болох Засаг даргын ажил хийх эрхтэй болдог. Төрийн ал­баны зөвлөлөөс тун удахгүй Булган аймагт сон­гон шал­гаруулалт явуу­лахаар зар­лаад байсан. Гэтэл Ж.Бат­баяр даргад сонгуулийн үеэр намынхаа төлөө зүт­гэвэл, намын нэр дэвшиг­чийг ямар нэг аргаар багийн хэмжээнд гаргаад ирвэл ажилтайгаа үлдэх нь гэсэн бодол төрсөн аж. Нөгөө­тэйгүүр багийн даргад су­мын намын хорооныхон ч  орон нутгийн сонгуульд намаасаа нэр дэвшигчийг баг, орон нутагтаа ялуулах үүрэг өгсөн байна. “Цалин­тай малчин” гэх цол гун­шинтай өнөө цагийн багийн дарга нарын нийтлэг дүр болсон Ж.Батбаяр ч чад­лынхаа хэрээр ажиллан намынхаа нэр дэвшигчийг Хонгор толгой багаас гар­гаж, ялуулсан ажээ. Ялал­тын баяр, ёслолын бууд­лагаа, ёроолыг нь харах хундага өргөсөн намынхан нь түүнд “багийн Засаг даргын албан тушаал бат” хэмээн хөөрөгдсөн болол­той. Нам нь ялалт байгуул­сан, өөрөө ажил­тайгаа үлдэх болсон Ж.Батбаяр дарга сархадтай хэд хоног нөхөр­лөх үедээ хүүгийнхээ ан­гийн охиныг хүчирхийлсэн дээрх жигшүүрт хэргийг үйлджээ. Хамгийн сонир­холтой нь, эх сурвалжийн мэдээлснээр хүчингийн хэрэг үйлдсэн Засаг дарга Ж.Батбаярын хэрэг хэрэг­сэхгүй болж байгаа гэнэ. Ж.Батбаяр дарга Хөвсгөл аймгийн харь­яат бөгөөд Хонгор толгой багт түүний ах дүү нар байдаг аж. Тус багт Засаг даргаар 2000 оноос хойш ажилласан бай­на. Засаг даргын эхнэр, ах дүү нар нь хохирогч охины эцэг, эхтэй удтал “хэлэл­цээр” хийсний үр дүнд Ж.Бат­баяр гэгч энэ мунаг эрхэм хүчингийн хэрэг үйл­дээгүй, харин завдсан болж таарсан байна. Ингэснээр хохирог­чийн ар гэрийнхэн мөнгө төгрөг, мал, хөрөнгө авч, нөгөөтэйгүүр олон жил айл саахалт явсан, танилын нүүр халуун хэмээсээр цагдаад “гомдолгүй” хэмээн мэдүүлж, Засаг дарга Ж.Бат­баяр хүчингийн хэрэг үйлдэхээр завдсан үйл­дэлдээ хэдэн төгрөгөөр торгуулиад өнгөрч байгаа бололтой. Өмнөх нийгмийн үед аливаа сонгууль ард түмний баяр, цэнгэл болж, төрөө дээдлэн, төрийнхөө эрхийг нэг өдөр атгахдаа хариуцлагатай, чин шудар­гаар ханддаг байсан нь түүх болон үлдэх нь ээ. Монгол оронд болж буй өнөө цагийн сонгуулиар 200 гаруй хүн санал өгсөн сонгол­тынхоо төлөөсөнд шорон­гийн хаал­га татаж, олон эх, эхнэр гашуун нулимсаа барж, таван хүн амь насаа­раа хохирч, адаг сүүлд нь сон­гуулийн хэнээтнүүд цэцэг цэв­рүү шиг охидыг бузар­ласан маягаар өрнөдөг, үр дүн нь гардаг болсон гэхэд хилсдэхгүй нь.Сонгуульд ялсан баяраа тэмдэглэдэг байдал нь ч элдэв дүр төрх­тэй болжээ. Ялсан намын­хан  аймаг, хотоос зайдуу газар гарч хоёр шөнө, гур­ван өдрийг март­тал архи­дан, хуваах бялуу­ныхаа хэмжээг тохир­сон шиг бая­раа тэмдэглэдэг томчуудын халдвар хөдөөд тусч, сар­хад зооглохын зэрэгцээ хүчингийн хэргээр хачир­лагд­даг болсны нэгэн жи­шээ энэ болов уу.  

Х.Улсболд