Ашигт малтмалын тухай хуульд нэмэлт, өөрчлөлт оруулах тухай хуулийн төслийг бэлтгэх ажлын хэсэг байгуулагдан ажиллаж эхэллээ. УИХ-ын гишүүн Х.Бадамсүрэнгээр ахлуулсан арав орчим гишүүний бүрэлдэхүүнтэй дээрх ажлын хэсэг өчигдөр үдээс хойш 15.30 цагт хуралдахаар товлогдсон байсан юм. МАХН, АН-ын гишүүдээс гадна Иргэний Зориг намын дарга С.Оюун уг ажлын хэсэгт багтжээ. Дээрх ажлын хэсгийн гишүүд мэдээж өмнөх парламентыи хэлэлцэж байсан хуулийн төслүүдийг авч үзэн, судалгаа хийж боловсруулна. Ашигт малтмалын тухай хуультай холбогдуулан өргөн барьсан хуулийн дөрвөн төсөл байгаа. Эцсийн хэлэлцүүлэгт бэлтгэгдсэн Ашигт малтмалын тухай хууль байгаа бол үүнтэй холбогдох Э.Бат-Үүл нарын гишүүдийн өргөн барьсан Бүтээгдэхүүн хуваах тухай хуулийн төсөл ч бий. Ямартаа ч ажлын хэсгийн гишүүд ирэх сарын 15-ны дотор Ашигт малтмалын тухай хуулийн төслөө боловсруулан УИХ-д өргөн барих ёстой юм байна.