Тамирчдын амжилтад нөлөөлдөг гол зүйл хоол тэжээл. Шинжлэх ухаан өндөр хөгжсөн энэ үед тамирчид өөрийн гэсэн хоолны мэргэжилтэнтэй ч байдаг аж. Аль болох илчлэг ихтэй хүнсний бүтээгдэхүүнийг хэрэглэх жорыг мэргэжилтнүүд гаргадаг байна. BBC ОХУ-ын алдарт теннисчин Мария Шарапова, АНУ-ын усанд сэлэгч Майкл Фелпс нарын ихэвчлэн иддэг хоолны цэсийг ийн сонирхуулсан байна.

Мария Шараповагийн зоог
Өглөөний хоол: Бяслагтай талх, улаан лооль, зөгийн балтай сүү, өргөст хэмх, амин дэмээр баяжуулсан ундаа.
Өдрийн хоол: аяга кофе, загасны эсвэл тахианы махтай шөл, бин, амин дэмээр баялаг ундаа, төрөл бүрийн ногооны салат.
Оройн хоол: Түүний идэх дуртай хоол бол үхрийн мах. Тиймээс амталж шарсан үхрийн мах бага зэрэг идэх нь элбэг. Мөн хар талх, тараг, алим.

М.Шарапова ихэвчлэн дээрх маягаар хооллодог аж. Мэдээж хоолоо хааяа солих нь бий. Харин бүсгүй цагаан будаа идэхийг нэг их хүсдэггүй. Шараповагийн хамгийн дуртай амттан бол шоколад. Амрах үеэрээ тэрбээр өглөө, өдрийн хоолны дараа шоколадтай мөхөөлдөс иддэг гэнэ. Мөн оройн хоолны дараа заавал 1-2 аяга тараг уудаг аж.

Майкл Фелпсийн зоог
Өглөөний хоол: Өндөгтэй гурван сэндвич, бяслаг, улаан лооль, шарсан сонгино, майонез, шоколадтай гурван бин, таван өндөгтэй омлет, сахартай гурван франц талх, каш хоёр аяга кофе.
Өдрийн хоол: гоймон, гахайн махан хачиртай хоёр гамбургер, бяслаг болон майонезтай талх, амин дэмээр баялаг ундаа.
Оройн хоол: соустай үхрийн мах, том пицца, амин дэмээр баялаг ундаа.

М.Фелпсийн өглөө, өдөр оройн зоог туйлын их илчлэгтэй аж. Өдрийн хоол нь гэхэд л таван эрэгтэй хүн идсэн ч хангалттай цадна гэсэн тооцоог мэргэжилтнүүд гаргажээ. Бээжингийн олимпод хосгүй амжилт гаргасныхаа дараа тэрбээр "Идэх, унтах, сэлэх гурав бол миний хийж чаддаг хамгийн том ажил" хэмээн хошигносон нь бий.

23 настай энэ залуу өдөр бүр таван цаг бэлтгэл хийдэг агаад алдсан энергиэ хоолоороо нөхдөг аж. Хоол судлаач Барбара Левин "Би янз бүрийн орны тамирчдын хэрхэн хооллодгийг судалж байсан. Гэхдээ Фелпс шиг өдөр бүр ийм их зүйл иддэг тамирчныг хараагүй. Хэрэв тэр цаашид ч энэ маягаар хооллосоор байвал амжилтаа удаан хадгалж чадах л байх. Гэхдээ биеийнхээ жинг хэтэрхий нэмж болохгүй" хэмээн өгүүлжээ. Амралтын үеэрээ Фелпс бүр ч их зүйл иддэг аж. Өглөөний хоолонд гэхэд л тахианы гуя, өндөгний салат, хар талх нэмэгддэг аж. Тэрбээр хоолны дэглэм баримтлахыг огт хүсдэггүй гэнэ.

Б.Өгдэй