Хоёр нисдэг тэргээ өнгөрсөн жил осолдуулсанаас хойш манай улс онцгой үед ашиглах нисдэг тэрэгтэй болохоор төсөвтөө тусгаж наймдугаар сарын эхээр ачаа тээврийн зориулалттай МИ-171Е маркийн нэг нисдэг тэрэг авсан. Харин хоёр дахь нисдэг тэргийг өчигдөр ЗХЖШ-ын Агаарын довтолгооноос хамгаалах цэргийн /АДХЦ/ нисэх хэсгийнхэн хүлээн авлаа.

Тус хэсгийнхэн шинэ загварын хоёр нисдэг тэрэгтэй болж байгаагийн хүрээнд уг онгоцыг жолоодох нисгэгч, засвар үйлчилгээний 22 ажилтныг ОХУ-ын Буриадын Улаан-Үд хотод сургаж бэлтгэсэн бөгөөд тэдний зарим нь болон АДХЦ-ийн командлагч, хурандаа Ш.Энхбат нар тус хотоос нисдэг тэргээ авчирлаа. Наймдугаар сард авчирсан нисдэг тэрэг нь ачаа тээврийн зориулалттай байсан бол энэ удаагийнх нь зорчигч тээврийн зориулалтаар тохижуулсан юм байна.

МИ-171Е нь уг төрлийн нисдэг тэрэгний бүх давуу чанарыг агуулснаас гадна цаг агаарын локатор, нисдэг биет болон газартай хэт ойртохоос сэргийлэх төхөөрөмж, байршил тогтоогч зэрэг сүүлийн үеийн технологийн дэвшлийг суурилуулсан байна. Зорчигч тээврийн зориулалтаар тохижуулсан уг нисдэг тэрэг нь 24 хүний суудалтай, ариун цэврийн өрөөтэй зэргээрээ өмнөх нисдэг тэрэгнүүдээс давуу талтай аж. Мөн нислэгийн дээд өндөр нь 6000 метр, дээд хурд нь 250 км/цаг, алслалт нь 750 км юм байна.

Уг нисдэг тэргийг Монгол Улсад хүлээлгэн өгөхөөр ирсэн Улаан-Үдийн төлөөлөгч Р.А.Холостов “Бидэнтэй өнгөрсөн жилийн яг өдийд хоёр нисдэг тэрэг худалдан авах гэрээ хийж байсан юм. Бид гэрээгээр хүлээсэн үүргээ биелүүлж, хугацаанд нь нисдэг тэргээ хүлээлгэж өгсөндөө баяртай байна” гэв.

Нисдэг тэргийг хүлээн авах ёслолд Батлан хамгаалахын сайд Л.Болд, ЗХЖШ-ын дарга, дэслэгч генерал Ц.Тогоо, БХЯ-ын төрийн нарийн бичгийн дарга, хошууч генерал М.Борбаатар нарын албан хүмүүс оролцсон юм.

Г.Цолмон