Нийслэлд 700 орчим гүний худаг бий. Эдгээрийн дийлэнх хувь хүний мэдэлд байдаг. Иймээс гүний худгийн усны чанар аюулгүй байдлын талаар Байгаль орчны улсын байцаагч Д.Доржпаламаас тодрууллаа.

-Гүний худгийг хувь хүмүүс өөрсдөө гаргадаг уу?
-Үгүй ээ, Усны хуульд усны мэргэжлийн байгууллагууд л худаг гаргана гэж заасан. Одоогоор ийм зөвшөөрөл бүхий 100 гаруй хувийн компани бий.

-Эдгээр гүний худаг эрүүл ахуйн шаардлага хангадаг уу, ямар шинжилгээ хийдэг вэ?
-Худаг гаргах хүсэлттэй иргэд хуулийн дагуу тусгай зөвшөөрөл бүхий компанид хандах ёстой. Тэр байгууллага нь тухай дүүргийн Засаг даргаас зөвшөөрөл авдаг. Ингэж байж л орчны болон нянгийн шинжилгээ хийх боломж бүрдэнэ. Эрүүл ахуйн хувьд хамгаалалтын бүсээс шалтгаална. Гүний худаг гаргахдаа 50-200 метрийн зайд хамгаалалтын бүс тогтоодог. Өөрөөр хэлбэл, хашаа барьж, эрүүл ахуйн шаардлага хангах ёстой гэсэн үг. Харин гэр хорооллын айлуудын хашаан доторх худаг жорлонтойгоо хэт ойрхон байдаг. Уг нь хамгаалалтын бүсийг 200 метрийн зайд тогтоох ёстой.

-Ундны усны чанарыг хэрхэн тогтоодог вэ?
-Хавар, намрын улиралд "Ундны ус эрүүл ахуйн шаардлага" МNS 900:2005 үндэсний стандартын дагуу шалгалт хийж тогтоодог. Ус түгээх байруудын хувьд тухайн ажилчин усан санг цэвэрлэж байх үүрэгтэй.

А.Амартүвшин